Omworeko gwa Bride and Groom aha tiivi na intaneeti gutongoziibwe.

266
0
SHARE



N’ebya Jacky Achan

Haihi emyaka 2 ebiri enyimaho obu endwara ya corona virus ebarukaho omunsi yoona hamwe n’okukingaho buri hamwe, emikoro y’okugaitwa ekeemerezibwa.

N’obu embeera eriyo neetereera mpora-mpora omu Uganda, abakundaine nibabaasa kugaitwa bakore omukoro gw’abantu 20 bonka kuba nibo baahikaho.

Enyimaho, kampuni ya Vision Group ekaba ekora omworeko gw’emikoro y’okugaitwa ahakishaayi Lugogo buri mwaka, ahi abo abaabeire nibateekateeka kugira emikoro y’okugaitwa babeire babuganira abarikuha obuheereza bw’ahamikoro egyo.

Aharwakashatu, bwanyima y’endwara kushisha emiringo y’okukoramu ebintu, Vision Group etongoize omworeko gwa Bride and Groom ogurikuza kworekyerwa ahamikutu ya intaneeti hamwe na za tiivi.

Orikukurira eby’amakuru ag’empapura omu Vision Group Barbara Kaija naagira ngu ogu n’omugisha gw’amaani kushagika abanya Uganda omukutebeekanisa emikoro yaabo y’okugaitwa, kutooranamu akatimba ak’omurembe, kutunga omugaati omurungi ogw’okuushara hamwe n’okutunga biriya ebimuri ebirungi eby’okuboneza omukoro.

“Okukinga eihanga ahabwa #COVID19 kwizire n’emirabanamu beitu hoona kugarukire kwaija n’emigisha. Ogu ningureeba nk’omugisha gw’amaani kasita ensi eba egumireho hamwe n’abantu barimu. Ruhanga yaaba atugiriire embabazi, abantu nibaija kuguma nibazaara, nibashwera/nibashwerwa; abantu nibaija kugumizamu nibafa kandi nibaija kunywa bagarukye barye. Abantu nibaija kugumizamu nibeetaaga obuheereza obu,” Nikwo Barbara arikugira.

“N’obu haraabeho okwemereza emirimo omumahanga, abantu nibaija kuguma nibaza omuri rikundo, nibaija kuba nibenda kuza omubushwere n’ahabw’ekyo nibaija kuba nibetaaga akatimba k’okujwara ahambaga, obuheereza nibwija kuba nibwetaagwa. Mbwenu ahabw’okugira ngu obuheereza obu nibwija kuba nibwetaagwa, twine kusherura emiringo ei turikwija kubuheerezamu kurungi.”

Kaija ahamize ku abanya Uganda barikukunda emikoro mihango y’okugaitwa kandi eboneire. “Eki nikyo kirikureetera twamanywa nk’abanya Uganda. Nitujaguza, titurikukunda kwecuririra, nitukunda kujwara gye hamwe n’okugira ekiteteeyi kirikureebeka kurungi.”

“Emigisha egi yoona ekiriho n’omubwire obu emikoro etarikwikirizibwa kandi eki ndikuhamya nitwija kuba nitugiheesheza obwongo kandi eki turiyo nitukora hati; kutongoza omworeko gwa Bride nad Groom ogw’ahamikutu ya intaneeti na za tiivi.”

Omworeko gugyendereire kureetera abanya Uganda baajaguza omukoro murungi gw’okugaitwa bakashemerererwa omumukoro gwabo n’obu haraabe hakiriho emihingo erikuxibira emikoro y’abantu baingi kubaho.

“Ogu nigwo mworeko gwa Bride and Groom gw’okubanza kubaho gurikworekwa kurabira ahamikutu ya za kanyabwengye na tiivi. Eki turiyo nitureeba aha nitwija n’okureeba ebindi ebirikukiraho kandi nibiija kuba nibishemeza munonga,” orikwebera eby’obwa kitunzi omu Vision Group Hope Nuwagaba nikwo arikugira. 

Nayongyera agira nguabantu baine kugumizamu n’amagara kandi barikuza n’omubushwere. “Okiineyo okugira ebimuri birungi birikureebekyesa kurungi omukoro gwawe, ebiteteeya birungi by’abagore, eyeshongoro birungi; tihaine ekyahindukire ayihireho obwire obwabeire butwetaagisa kukora ebintu omuringo ogurikutaanaho,”

“Tukiine kugumizamu turikusherura abarikuha obuheereza oburungi abarikuza kureeta ebijwaro birungi bya’abagore, abarikureeta ebyokurya kandi twine kukora omukoro ogw’omutaano kwenda ngu tuteho okugaitwa kurungi n’obugwakuba guri omukoro mukye,” Nuwagaba nikwo arikugira.

Naagira ngu omworeko gwa Bride and Groom ogu nigwija kworeka ebi abantu barikwenda kumanya ahamikoro. “Abagore baitu nibaija kuza aha intaneeti kureeba emishono y’emijwarire eri ahamurembe, n’obutimba bw’abagore oburi ahamurembe.”

“Nituraganisa abareebi baitu ku barikwija kureeba emishono y’emyenda emirungi, batungye obuhabuzi oburikukizayo oburungi kuruga omuri ba Ssenga. Eki n’ekiraganiso kuruga omur’itwe aba Vision Group kureebeka ngu twabaha omworeko ogurikukizayo oburungi.”

Nuwagaba hoona nabwo naagaruka araganisa abu Vision Group erikuza kukwatanisa nabo ku barikuza kutunga ebirikuhika esente zaabo ku baraije bakabahikiirira kworeka obuheereza bwabo ahabantu batari bamwe na bamwe.

Omworeko gwa Bride and Groom Virtual Expo nigwija kuza ahamikutu yoona eya Vision Group erimu empapura z’amakuru, za tiivi, rediyo hamwe n’emikutu yaaabo eya intaneeti.

Obwo barikutongoza omworeko ogu aha offisi enkuru eza Vision Group omuri Kampala aharwakashatu, owatandikireho kampuni ya Bridal na Kid’s World, asiimire Vision Group ahabw’okuteeka kukora eki nikwo kushaba abantu abarikuha obuheereza kwakiira enteekateeka egi n’emikono yombi.

“Okukorera omworeko aha mikutu kigumire kwonka nikikwongyerayo kuhika abantu kandi hati emikutu ya intaneeti nigwo murembe oguriho obwa hati. Tihaine ondiijo ou orikubaasa kukora nawe kureka Vision Group ahabw’okuba nekubaasisa kuhika abantu abantu baingi ahamikutu eya intaneeti, za tiivi hamwe n’omumpapura z’amakuru… akatare ni kahango,” Kyambadde nikwo arikugira.


Omuhwezi wa mukuru wa kampuni ya Vision Group kandi omuhandiiki mukuru, Gervase Ndyanabo ashabire abo abarikwenda kukora emikoro y’okugaitwa hamwe n’abarikukunda munonga emikoro egi kureeba omworeko omubwingi. “Nigwija kuba guri muhango kukira ogu abantu baingi barikuzamu. Nigwija kuba guri ahatiivi zaitu, za rediyo, emikutu y’aha intaneeti hamwe n’omumpapura z’amakuru.”

“Abarikwenda kworeka ebi mwine, ogu nigwo mugisha gwanyu ogu mwabeire mutakatunga ga. Nimwija kuba mwine amaisho maingi garikureeba ebintu bingi,” nikwo Ndyanabo arikugira.

“Tushemereirwe ahabw’okugira ngu omworeko gwa Bride and Groom gutwireho kumara emyaka 12, kureka omwaka oguhweire obu tutaragugizire ahabw’endwara hamwe n’okukingaho eihanga,” Ndyanabo nikwo arikwongyera akagira.   Omworeko gwa Bride and Groom nigwija kuba nigworekwa buri rwamukaaga na Sande kutandika na 11.09.2021 kuhisya 03.10.2021. Nigwija kuba niguzaho shaaha 8 kuhisya 10 z’eihangwe orwamukaaga hamwe na shaaha 9 kuhisya 11 aha sande. 

“Wiikendi niko kaire karungi k’okureeba omworeko. Mbwenu nobaasa kweshutamira omuka reeru oyegaite ahari abo abaraaze omumworeko,” Ndyanabo nikwo arikugira.

LEAVE A REPLY