Abasiraamu ba Ankore – Kigezi baashabwa kucucuka!

439
0
SHARE

N’ebya Abdulkarim Ssengendo

Kadhi w’ekyanga kya Ankole-Kigezi, Sheikh Abdallah Katamba, yaashaba abasiraamu omukyanga hamwe n’omubindi byanga eby’ihanga kukoresa obwire obu kushaba ekiganyiro.

Katamba ebi yaabigamba obu baaba bari omukusaala oku baakora omumuringo gw’ekinya sayansi kandi hoona okwaba nikworekwa ahambeho za TV West omuri Mbarara. Katamba hoona nabwo yaahiga abasiraamu kwimukira hamwe bakebembeza obusingye n’obumwe hamwe n’okugaruraho rukundo n’obwecureezi kandi ebi byona babite omushaara zaabo.

Kadhi w’ekyanga kya Ankole-Kigezi, Sheikh Abdallah Katamba niwe yayebembera okusaara oku kandi hoona okwayejumbirwamu n’abandi bebembezi b’ediini y’obusiraamu omukyanga.

Omubaro mukye ogu ogw’abasiraamu abayejumbira omukusaara oku nigureetwaho endwara ya #COVID19. Ahabw’akeeshereko k’ebiro 42 akuateirweho, abasiraamu baingi baasaarira omumaka gaabo

Sheikh Abdallah Mukwaya, Khadi wa disiturikiti ya Mbarara, yaashaba abasiraamu hoona ahi bari kugyendera ahamateeka agaateirweho kurinda okujanjaara kwa  #COVID19.

Okujaguza ekiro kya Idd Adha nikwijuka ekitebyo kya Nabbi Ibrahim kwikiriza kuhonga omwana we nk’akamanyiso k’okutiina ekiragiro kya Ruhanga.

Ahakiro eki, abasiraamu nibejumbira omukubaaga enyamaishwa nk’ekitambo eki barikuhayo ahari Ruhanga

Sheikh Ssenyange Muhammed, Amir w’ekyanga ekya Burengyerwa’izooba yaashaba abasiraamu okwehwamu bakahayo ahari Allah barikugyendera ahakikorwa kya Nabbi Ibrahim owayorekire okwikiriza kwe kuhonga omutabani

Hajjat Murungi Shamim, omuhandiiki mukuru w’abakazi omuri Burengyerw’izooba yaashaba abazaire kwehisya abaana baabo na munonga omukaire k’akaire k’akeeshereko aka

“Abaana abamwe nibabahamba batiina kugambira abazaire baabo ahabw’okuba tibabamanyiriire, ba omuzaire n’obu oraabe otakazaire,” nikwo Shamim arikwongyeraho

Kandi hoona nabwo yayongyera yaarabura abazaire abarikuharahaza abaana baabo ekirikubareetera baakora ebintu ebirikushiisha nyensya yaabo. Hoona yaagaruka yaashaba abashaija obutanagiirira amaka gaabo

Okusaarira omuka

Bamwe omubasiraamu baasaarira omumaka gaabo kugyezaho kukuratira ebiragiro ebyateirweho Purezidenti Museveni. Omukwezi kwa 6 Museveni akataho ebiro 42 by’akeeshereko kugyezaho kukyendeeza okujanjaara kw’akakooko ka coronavirus kandi okukinga amaramizo gukaba guri omuringo gumwe gw’okwetantara.

LEAVE A REPLY