Okugaba obuhwezi bwa ‘Lockdown’ kuhwe orwakashatu! –Rt. Hon. Nabbanja

452
0
SHARE


N’ebya Nelson Kiva

Ekitongore ky’ekikura ky’abantu baine kukora obucweka eihembe kureebeka ngu abantu abashemereire kutunga obuhwezi bw’abatarikwebaasa omukeeshereko k’ebiro 42, okurugiirira ahakuragiira kw’enganzi y’eihanga, Rt. Hon. Robinah Nabbanja.

Abantu 501,107 nibo bashemereire kuba nibatnga shiringi 100,000 kandi okurugiirira ahakiragiro kya Nabbanja bashemereire kuba baazitungire nyencakare.

Abantu barikurengaho kakye omuri 60,000 nibo babeire baatungire sente ezi nyomwebazyo kandi ekibuuzo nikigira ngu hoona abandi 430,000 nibaija kuba baatungire sente ezi bwaza kurenga nyencakare?

Omuhandiiki mukuru w’ekibiina, Aggrey Kibenge nyomwebazyo agambeire abanyamakuru ngu abarikuza kutunga sente ezi beegabaneisemu omundembo zirikurenga omuri 20

Endembo ezi zirimu; Rukungiri, Shema, Ibanda, Kisoro, Arua, Gulu, Kotido, Kitugum, Busia, Hoima, Mbale, Bushenyi-Ishaka, Soroti,Masindi, Kabale, Bugiri, Apach, Entebbe,Mukono, Nansana, Kiira, Makindye, Rubaga, Kampala Central, Nakawa.

Beiitu hoona tihaine orurembo oru ebicweka 100 ahari 100 by’abantu barwo boona abashemereire kuba nibatunga sente ezi abaatungire kuhwayo, okurugiirira ahakitongore.

Ku ebirikukwata ahabantu aba birikwija, nitubashwijuma, ebirikubakwataho babyohereza omu Post Bank kwenda ngu ab’ebitongore by’amasimu baheereze sente ezo,” Kibenge nikwo agizire. Ebitongore by’amasimu birimu MTN na Airtel.

Ekitongore kibaire kiine kuba kyahamize abantu abashemereire kutunga obuhwezi obu aharw’okubanza. Beitu abantu 343,143 nibo babeire baahamiibwe omu ihanga ryona.

Kibenge naagira ngu okukyererwa oku kureetsirweho ahabw’okugira ngu abantu abashemereire kuba nibatunga obuhwezi obu nibaingi munonga waagyera-gyeranisa n’emyanya endiijo. Amaka garikurenga 150,000 nigo garikuza kutunga obuhwezi obu omuri Kampala honka kandi gavumenti eteire shiringi obuhumbi 15 kushashura abantu abari omururembo rukuru rwonka

#WestUpdates

LEAVE A REPLY