Okwehandiikisiza eza #COVID19, Fort Portal, n’orwanju.

203
0
SHARE

N’ebya Wilson Asiimwe

Baingi omubatuura-gye b’omururembo Fort Portal bashobeirwe oku barikuza kwehandiikisa kandi bakahamibwa kwenda ngu batungye obuhwezi bwa gavumenti obu erikuza kuheereza kurabya abatarikwebaasa omu ‘Lockdown’.

Bamwe omubatuura-gye batwire nibahikiirira bakuru b’ebyanga byabo beitu hoona ababeire nibababinga bagumize ngu bo tibakatungire rusa rw’okubahandiika.

Irene Kansiime omutuura-gye wa Rwengoma omu Central Division owaabeire aine ebaara enyimaho ahakatare ka Mpanga agizire ngu aha Sande akahikiirira mukuru w’ekyanga kye kuhandiikisibwa akatunga shiringi 100,000 nk’oku gavumenti eraganeise kwonka bamubingire.

“Titurikumanya omuringo oguraakoresibwe kugaba sente ahabw’okuba n’abebembezi baitu bashobeirwe. Ku tugyerizeho kubahikiirira, babeire bataine eki barikukimanyaho,” Kansiime nikwo arikugira.

Nayongyera agira ngu bamwe omubatuura-gye babeire nibaza aha ofiisi y’omujwekyerwa wa Purezidenti omururembo beitu ngu nawe abeire nabagira ngu bagarukye omubyaro byabo.

Ibrahim Bwambale omuvugi wa taxi aharwa Kasese-Fort Portal we naagira ngu tihaine n’omwe owaabahikireho omukibiina kyabo ky’aba Taxi ahabikwatiraine n’eby’okwehandiikisa

“Turi omukushoberwa kwonyine. Baingi omuri itwe tibatufeireho kandi tutiinire ngu nitubaasa kufeerwa sente ezi ahabw’okuba tihaine n’omwe owaatuhikire,” Bwambale nikwo arikugira.

Nayongyera agira ngu, “Omubyaro bimwe nituhurira ngu ba ceyamaani abamwe bariyo nibakora enkarara z’abantu abarikutunga obuhwezi kwonka owaitu tihaine mwebembezi n’omwe owaatuhikireho.”

Naagira ngu omubyaro ebimwe ba ceyamaani babeire nibahandiika abantu baabo kandi omurimo gwijwire obutetegyereza bwonka.

Beitu omuri Karago diviijoni, ceyamaani wa cell ya Katunguru Julius Mwesige naagira ngu abeire yarundaine orukarara rw’abantu kandi yaaruteire ow’omujwekyerwa wa Purezidenti omururembo Fort Portal kandi ngu abantu be bategyereize sente.

“N’abantu abatashemereire kuba nibatunga sente babeire nibatuhikiirira kweehandiikisa kwonka tubaire twine kwegyendesereza ahabw’okuba ogu n’omurimo gutanguhi,” Mwesige nikwo arikugira.

We orikujwekyera Purezidenti omururembo rwa Fort Portal, Rogers Mbabazi, enshumi nkye ehweire agizire ngu abantu boona abaine kutunga obuhwezi bwa #COVID19 nibaija kuhandiikwa kandi bashashurwe.

“Nitwija kukora n’abebembezi b’ebyanga boona omukureebeka ngu abantu boona batunga sente zaabo bwanyima y’okushwijumwa n’okuhamibwa kandi tihaine oraazifeerwe,” nikwo Mbabazi agizire.

LEAVE A REPLY