Congo n’ey’okwegaita ahamahanga ga Burugw’izooba

343
0
SHARE


N’ebya  John Masaba

Orikukurira ekibiina ky’amahanga ageeteeraine aga Burugwa-izooba bwa Afrika, Peter Mathuki, naagira ngu baamariirize entebeekanisa z’okwikiriza eihanga rya Democratic Republic of Congo kwegaita ahamahanga agandi aga Burugwa-izooba bwa Afrika

Mathuki eki akirangiriire obu abeire ari omururembo Kinshasha ahi abeire ayebembeire ekikoosi kushwijuma eihanga, kandi eidaara ery’ahamuheru eri eihanga ririkurabamu ririkwegaita ahamahanga k’ekyanga ekya Burugwa-izooba bwa Afrika

“Okushwijuma oku kushemereire kuba nikuhwa omubiro 8. Bwanyima y’ebiro ebi nitwija kurundaana ebiraarugyemu tubitwarire abebembezi b’amahanga g’ekibiina eki,” nikwo agizire obwo agumize ngu aba ku baraikirize buri kimwe kyona eki turaabatwarire, Congo neija kutwegaitaho omunshumi nkye erikukurataho kandi nibaija kuba baaba aba 7 omukibiina eki.

“Nomanya ngu DRC neyatana na South Sudan, Uganda, Rwanda, Burundi and Tanzania. Ago n’amahanga 5 ga Burugwa-izooba bwa Afrika. Mbwenu ku barikutwegaitaho nitwija kuba ekyanga kihango omunsi yoona. N’omuby’entaasya nitwija kweyongyera omumaani,” nikwo agizire

Agizire Congo neija kuheebwa omugisha kuhayo amaziina g’abatuura gye 9 kwegaita ahabanyabiragiro ab’ekyanga eki. Nibaija kuhayo n’abantu baabo abaraabe nibashutama omu kooti y’amahanga aga ey’eby’oburingaaniza.

Ayongyeire yaagira ngu, “Purezidenti wa Congo, Felix Tshisekedi, ayakiire obutumwa obu n’amashemererwa maingi kandi ngu ayorekyereire kureeba ripoota egi erikushohora. Omubwire butari bwa hare Congo neija memba w’ekyanga eki omubwijwire.”

Ekibiina ky’amahanga ga Burugwa-izooba kikatandikwaho 1967, kyaija kyagwa omugwa 1977 kandi kyaija kyagarurwaho ebiro 7.07.2000. Omugwa 2008 bwanyima y’okuhajaanaho n’ekibiina ekirikushongyera entunguuka y’amahanga ga Afrika ey’amashuuma ekirikumanywa nka Southern African Development Community (SADC) hamwe n’ekirikushongyera akatare kamwe omuri Burugwa-izooba n’amashuuma ga Afrika nari shi Common Market for Eastern and Southern Africa (COMESA), amahanga aga bakaikirizana kuhangusya ekyanga ky’akatare oteiremu n’amahanga agu ebibiina ebi birimu. Okwegaita kw’amahanga Burugwa-izooba bwa Afrika n’omuringo gumwe gw’okwegaita omuby’obushuubuzi ahagati y’amahanga ga Afrika. Ekitebe ekikuru eky’ekibiina ky’amahanga ga Burugwa-izooba bwa Afrika kiri omururembo Arusha omu ihanga rya Tanzania

LEAVE A REPLY