Bagamuhunda n’ow’okuhuumura bukiri kare

201
0
SHARE


N’ebya Job Namanya, Kabale

Bishop w’obureeberezi bwa Kigezi Rt. Rev. George Bagamuhunda arangiriire ku arikwija kuhuumura bukiri kare kuruga omumirimo y’ekanisa ahabw’enshonga z’okuburwa amagara marungi.


Bagamuhunda naagira ngu okuhuumura kwe nikukuratira entwaza ezi ogu ekanisa erikukoramu emirimo yaayo.


“Ab’ahakakiiko ka dayosiisi naabagambeire ku ndikwenda kuhuumura kandi baatandikire emirimo y’okumpuumuza. Ish’abareeberezi w’ekanisa ya Uganda, His Grace Kazimba Stephen Mugalu yaikiriize okuhuumura kwangye,” nikwo agizire.


Bagamuhunda akatooranwa omugwa 2013 kandi yayemekwa ommukwokubanza omugwa 2014 nikwo kuza omubigyere bya Rt. Rev George Katwesigye kandi hoona owaabeire aheereize omubureeberezi kumara emyaka 15.


Bagamuhunda naagira ngu akakunda okukora n’abebembezi n’abaishemwe omubureeberezi kandi emirimo ye omumyaka 8 eteireho purojekiti ezirikubarirwa omubukaikuru bwa sente kandi ezirikwija kuhwera ekanisa kutunga entaasya.


Agizire ngu okuheereza ah’idaara eryo kumubonereire kandi haine ebintu bingi ebiraiije kumufeera yaaba yahuumwire.


“Ninyija kuba ninfeerwa rukundo n’obutagatsi obu ab’ishemwe babeire nibampa omubwire obu mbaire ndi omureeberezi. Ninyenda kuhamiza abaishemwe ngu n’obu ndaahuumure ninyija kuba ndiho ahi ndaagume naayetwa kuheereza Ruhanga.”


Ekirari kya Bagamuhunda
Omuhandiiki w’obureeberezi bwa Kigezi, Rev Erasmus Turyatunga, agizre ngu amakuru ga Biishopu kuhuumura kare gaahikire omukakiiko kandi hoona aka nikaija kutaho orukiiko ahi ba memba 15 barikwija kutooranwa kutoorana abantu 2 ab’okuza omubigyere.


Turyatunga asingiize Bagamuhunda ahabw’okureebeka ngu hariho obumwe omubuheereza bwe.


“Titukatunga ga ntaro zoona omukanisa omubutware bwa Bagamuhunda. Niwe nyomyo eyareeteire ab’ishemwe omubureeberezi bayimukira hamwe omuntunguuka,” nikwo agizire.


Okurugiirira ahari Turyatunga, Bagamuhunda naija kuguma omubihandiiko by’obureeberezi nk’omuntu ou obuheereza bwe butarikubaasa kwinganisibwa omubintu ebikozirwe kandi ebirikureebwa hamwe n’okuba omunyamazima.

Turyatunga aheire eky’okureeberaho ekyombeko eky’ekanisa rwiguuga eya All Saints omu tauni ya Kabale ekyatwaire obusiriira bwa sente kandi hoona ekyayombekirwe ahansi y’obwebembezi bwa Bagamuhunda.
Ekindi n’ekyombeko kya Mothers Union ekirimu eishemerezo, ebicweka by’okuzaariramu n’okuraguririzamu ah’irwariro rya Rugarama n’ekyombeko kya revival n’ebindi bingi.


Turyatunga hoona agarukire yaagira ngu akatandika ekigyendererwa ky’okutandikaho eicundiro ry’amajuta omugomborora ya Hamurwa omu disiturikiti ya Rubanda nk’omuringo gw’okureetaho entaasya eyetongoire ahabw’obureeberezi.


Agarikire kandi hoona yahimbisa Bagamuhunda ahabw’okutunguura eby’amagara n’eby’obwecumi omumaka omubureeberezi obwo barikutimba amaizi omubicweka birikurenga omuri 60 nk’omuringo g’okuhisya abantu amaizi marungi omubantu.


“Biishopu hoona nabwo naija kuguma naijukwa ahabw’okumariira ekigyendeererwa kye eky’okutandikaho rediyo ehwereire obureeberezi kugumizamu nibubuurira engiri omubiro ebyabeire bigumire kutamburiramu ebya lockdown,” nikwo Turyatunga arikwongyeraho atyo.


Can. Johnson Baryantuma Munoono, mukuru w’abakristaayo omubureeberezi agizire ngu Bagamuhunda abaire ari murungi ahakuteera ehururu ekimureeteire yamara emirimo ye atatungire okuteganisibwa kw’amaani.


“Abaishemwe nibamwikiririzamu ekintu ekimureeteire kubatungamu ebintu agyendereire kutaho za purojekiti zitari zimwe na zimwe omubureeberezi,” nikwo agizire.


Baryantuma agizire ngu purojekiti y’okubanza eya Bagamuhunda omu ofiisi y’omureeberezi kukaba kuri okwombeka enju y’omureeberezi kandi akihikiiriza omumeezi makye.


Ebi oyine kumanya ahari Bagamuhunda.
Bishop Bagamuhunda akazaarwa 1958 omukyaro kya Nangara omu disiturikiti ya Rubanda.


Akashomera Rujanjara Primary School omu disiturikiti ya Rubanda na bwanyima yayegaita ahari Kigezi College Butobere kushoma siniya.


Na bwanyima akaza Bishop Tucker School of Theology and Divinity omuri Mukono, ahi yaatungire diipuloma omuby’ediini kandi yayemekwa nk’omushomesa omugwa 1983.


Akaheerezaho nka Chaplain wa Kihanga Secondary School atakagarukireyo ah’ishomero kutunga diiguri y’eby’ediini ah’ishomero rya Bishop Tucker.
Aine na satifiketi na diipuloma omukukora amaizi.


Omugwa 1995, akatunga diiguri ya masters omukukora amaizi
Omugwa 2007 akeemekwa kukora nk’omushugaanisa w’ekyanga omuby’entebeekanisa obu Henry Luke Orombi yaabaire ari Ish’abareeberezi kandi omugwa 2010 akatooranwa nk’omuhandiiki mukuru w’ekyanga ahabw’ekanisa ya Uganda.

LEAVE A REPLY