NRM etungire amagaari 600-Ibanda

534
0
SHARE

Ekibiina kya NRM omuri Ibanda batungire amagaari garikurenga omuri 600 eza ba ceyamaani b’ebyaro n’emiruka.

N’ebya Stephen Nuwagira

Obwo barikwakiira amagaari 665 ahapoorisi y’ibanda nyomwebazyo orwakabiri ebiro 18, omuhandiiki mukuru w’ekibiina ahabwa disiturikiti ya Ibanda, Elias Tumubweine, agizire ngu amagaari aga n’ag’okuhwera omuntambura z’abebembezi obwo baaba nibakora emirimo y’ekibiina nk’okuteera emiranga ahari puroguraamu za gavumenti omubyanga byabo batainemu kuteganisibwa.

“Oku n’okuhikiiriza okuraganisa oku Purezidenti Yoweri Museveni, kandi hoona mukuru w’ekibiina eki, kuheereza buri ceyamaani w’ekyaro n’omuruka egaari bwanyima ya baingi kwetomboitwa ngu nibaba bataine ntambura baaba nibaraba omubyanga barikukora emirimo y’ekibiina. Mbwenu, tushemereirwe kureeba ngu eriizooba twayakiira egaari kuruga ahakitebe ekikuru eky’ekibiina,” Tumubweine nikwo agizire.

Ayongyeire yaagira ngu bakuru b’ebyanga abaareebize ekibiina bakashagika abo abaabeire bataine bibiina ninga ab’omubibiina ebindi tibarikuza kutunga egaari ezi, nk’oku ekibiina kirikuragiira.

N’obu abebembezi b’ebyanga abamwe baraabe nibakora nka bakuru b’ebibiina omubyanga ebyo, aba NRM nibo baraatungye egaari ezi, nikwo arikushoboorora.

Obeth Asiimire, orikujunaanizibwa eby’amakuru g’ekibiina aha disiturikiti, agizire ngu okutunga amagaari aga nikiihaho disiturikiti orubanja ahi abantu babaire baatandikire kugira ngu sente ezaabahairwe zikaryangatanisibwa abebembezi baabo.

“Turiyo nitureeba embeera y’egaari ezi. Na bwanyima nitwija kureeta ba makanika kukora ahabuzibu bwona oburashangwemu kandi abatungire ezi egaari nibaija kwija nibazaakiira,” nikwo agizire.

Egaari ezi niziteekateekwa kuheebwayo ahari ba ceyamaani wiikendi egi, okurugiirira ahari bamwe omubakungu ba disiturikiti.

LEAVE A REPLY