Aba boda boda omuri Kabarole batweirwe omukooti ahabw’okunyaga 21m

411
0
SHARE

N’ebya Rogers Sunday

Ekibiina ky’abavugi ba za boda boda kitwaire ba memba baakyo barikuhika 16 omukooti ahabw’okwanga kushashura miriyooni.

Sente ezi n’ekicweka kya sente zirikwingana 60 ezi ekibiina eki kyatungire ahansi ya puroguraamu egyendereire kutunguura ebyanga ebya Luwero na Rwenzori omugwa 2014 ezaabeire ziine kukoresibwa omumuringo gw’okutaana embu

Edward Rugumayo, orikwebembera ekibiina eki naagira ngu bwanyima y’okutunga sente, ekibiina kikacwamu kugura piki 20 za bajaj ezaagabaganisiibwe omuri ba memba nk’omuringo gw’okubatunguura

Okurugiirira ahari Rugumayo ba memba abaatungire piki ezo bakaba baine kugaruza sente ezo kwenda ngu ba memba abandi nabo baganyirwemu

Rugumayo nashoboorora ngu ni ba memba bakye munonga abashashwire sente ezo. Ekibiina kikakoresa obusente obundi obwabeire bubiikirwe kugura piki ezindi 33 kandi hoona nazo azaabaganisiibwe omuri ba memba abandi.

“Tukabanza twatunga piki 20 kandi ku twatungiremu obusente obundi twagura piki 33 ezindi nikwo kukora omubaro gwa piki 53. Beitu kuruga obwo, okutunga sente ezo kibaire ekizibu,” Rugumayo nikwo arikugira.
Omuringo ogu sente ezi zirikushashurwamu mpora mpora kishanyaraize entunguuka y’ekibiina ahabw’okuba ba memba abandi ababeire bashabire kutunga beemereziibwemu.

“Tutaireho emiringo yoona erikubaasika kureebeka ngu sente ezi zaashashurwa kwenda ngu ba memba abandi nabo baganyirwe omukibiina. Tugambire nabo kwonka tibarikwenda kuhurira nikyo tucwereiremu kuza omukooti.

Obwa hati piki ezimwe ziri omumbeera mbi. N’obu twakuzikwata tihaine kihango eki turikubaasa kuziihamu,” nikwo Rugumayo agizire.

David Mwesige, omuhandiiki w’ekibiina naagira ngu n’obu zimwe ahari za piki zikwatsirwe, ebeeyi yaazo yaakyendeire kandi tizirikubaasa kukwatirizibwa ahabwa sente ezi ba memba barikushaba.

Chris Baguma omwe omuri ba memba ab’ahakakiiko akakuru agizire ngu bamwe omuri ba memba abaatungire bakaba nibateekateeka ngu piki ezaabaheirwe kakaba kari akasiimo kuruga owa gavumenti

Abaanyagire, ku twagyerizeho kubakwata, baagira ngu piki ikaba niiruga omu gavumenti kandi ekaba etari looni.

Bamwe omuri ba memba tibakaganyiirwemu ahabw’okuba abo abaatungire omukubanza bakanga kushashura.

Nibateekateeka ngu nibo bakama b’amapiki aga kandi obwo banyagire gavumenti,” Baguma nikwo agizire.

Hoona nabwo ba memba b’ekibiina bateire orubanja ahabwebembezi oburiho ahabw’enkora mbi n’oburi bwenguzi ekyareeteire okugarura kwa sente za puroguraamu egi.

Asaf Twine, member w’ekibiina ekya Kabarole Boda Boda Association naagira ngu baingi omuri ba member baabo bakacwamu kutunga za looni kuruga omumabanka ezi arikugira ngu hoona nizishaba amagoba g’ahaiguru.

“Obwa hati tukaabaire twine piki ezaitu kwonka mukuru w’ekibiina akoreise kubi empiiha za puroguraamu ya Luwero-Rwenzori revolving scheme,” Twine nikwo agizire.

Eric Mwesige memba ondiijo ow’ekibiina nayenda ngu gavumenti econdooze omumikorere y’obwebembezi bw’ekibiina oburiho hati.

“Akakiiko akakuru ak’ekibiina tikaakibaasa mirimo, titwakagirahoga orukiiko rw’omwaka, nkagyezaho kubuuza kwonka tindabaasize kugarukwamu,” Mwesige nikwo agizire.

LEAVE A REPLY