Okuhurira omushango gwa Hon. Rukutana kwayongyezibwayo

654
0
SHARE

Tushabe Andrew na Adella Mbabazi

Kooti omuri Ntungamo yayongyezayo okuhurira omushango gw’okugyezaho kwita, ogwatabariziibwe ahari Minisita w’eby’abakozi, Hon. Mwesigwa Rukutana, bwanyima y’abajurizi kubura omu kooti

Ba kihababa nibagira ngu Rukutana, ebiro 5.09.2020 obwo ari owe omuri Ruyonza omugomborora ya Rubaare, akateera amasasi ahamotoka eyabaire erimu ba agyenti b’ou yabaire ayesimbire nawe omukaruuru k’ekibiina kya NRM.

Minisita Rukutana owayehikira kooti obwo aine omuhoreereza we Owen Mulangira kandi hoona owaashaba kooti ku ereka kushiisha obwire bwa Minisita agumize ngu omushango ogu gwine ekigyendererwa ky’okushisha eiziina rya rye.

Hon. Rukutana ari ahamishango y’okugyezaho kwita arikukoresa embundu, okutiinatiinisa abantu hamwe n’okushiisha ebintu ei arikugambwa kuba yaakozire omukaruuru k’okusherura orakwate ebendera y’ekibiina kya NRM ahabw’ishaza rya Rushenyi omuri Ntungamo.

Omwe ahabahorereza ba Hon. Rukutana, Owen Murangira arikugaaniiraho n’abanyamakuru aha Chief Magistrate’s Court, Ntungamo Photo: Tushabe Andrew

Murangira hoona yayongyera yashoboorora ngu bo n’obu baraabe nibateekateeka ngu emishango egi egyendereire kushisha eiziina rya Minisita kwenda ngu ateganisibwe omukusherura akaruuru, tibaine kiteekateeko ky’okugaruka omumbuga z’ebiragiro kujuriza eby’oburuuru ku barasingye emishango eteirwe ahari Minisita.

Omuhorereza wa gavumenti, Richard Muhereza naagira ngu tibaabura beitu baakyererwa kuhikaho bwanyima y’okumanyisibwa kikyererezi bakabura obwire bw’okwetebeekanisa kurungi. Omukugamba kwe yaashaba kooti kuheereza ba kihababa wiiki 2 kuba bayetebeekaniise.

“Itwe tutungire okumanyisibwa wiiki ehweire obu ebaire eri haihi kuhwa ku barikutwenda omu kooti eriizooba kwonka nituhamya ku turikuba turiho nyencakare kandi n’obwamushaija bwona oburikusingisa Minisita emishango,” nikwo Richard yayongyeraho.

Omuramuzi wa kooti, Gordon Muhimbise yayanga okushaba oku agumize ngu kooti ekaheereza ba kihababa obwire burikumara kweteekateekyera okuhurira omushango.

Kooti negarukamu kuhurira omushango ogu nyencakare ebiro 13.04.2021 omumbuga zaayo omu Munisiparite ya Ntungamo.

LEAVE A REPLY