D.H.O Mbarara arabwire ahancuro ya kabiri eya #COVID19

1150
0
SHARE

Tushabe Andrew, Mbarara

Okurugiirira ahamakuru kuruga omukitongore ky’ensi yoona eky’eby’amagara, obukooko bwona oburikureeta endwara, oteiremu n’akakooko aka SARS-CoV-2 akarikureeta endwara ya #COVID19, nibwekoramu obukooko oburikuba nibubushusha bwanyima y’obwire.

Obwire ku burikugyenda, obukooko obu bwaguma nibwekoramu butaahi bwabwo, nibwija buhinduka omunkora n’omunkura yabwo kandi eki n’ekya buriijo omuukooko bwona; eki abajungu barikweta “mutation”.

Akakooko akarikubaho bwanyima y’empinduka omurundi gumwe nari emirundi erikurenga ahari gumwe, nikaija kahindukaho omunkora ashanga nikataanaho kakye n’ahari ako akaabandize karugamu ekirikwetwa “variants” omurujungu.

Akakooko ak’omuringo ogu ku karikukwata abantu nikaija karikureebeka nka akasya hoona n’obu karikuba kaarugiriire omuri kariya akaabandize.

Ekirikureetera akakooko aka kuguma nikahinduka n’ahabw’okuguma nikajanjaara omubantu baingi . Ku karikuguma nikajanjaara, kaguma nikatunga emigisha mingi y’okuhindukamu akasya.

Empinduka y’akakooko aka nebaasa obutagira eki yayongyera eky’okureeberaho nk’ahamaani g’okujanjaara. Kwonka okurugiirira ahampindahinduka ezi karikuba karabiremu omunkura n’omubiri gwako, nikibaasa kureetaho empinduka omumaani gaako agarikukabaasisa kujanjaara oshangye kakyendeire nainga keyongyeire omumaani g’okujanjaara.

Nainga oshangye ku karikukwata omuntu katarikumurwaza munonga nk’omukubanza nainga oshangye nikamurwariza kimwe munonga kukira oku kaatandikire.

Obwa hati abarikusheruriza ahakakooko aka nibakora emibazi eine amaani maingi kugira ngu n’obu akakooko aka kaakuhinduka omunkura yaako, katakaarahuka kukiza amaani emibazi kandi ahi karaaze kubeera ak’akabi munonga, babe nibakimanya kandi bongyere ahabirungo ebi bashemereire kuba nibongyera omumibazi ei barikukora.

N’obu eihanga riraabe ritungireho omuringo gumwe gw’omubazi ogurikusirika akakooko aka aka #COVID19, orikukurira eby’amagara omu disiturikiti ya Mbarara Dr. Peter Ssebutinde, nayehanangiriza abantu boona ku barekyer’aho okwiha amaisho ahabiragiro ebyateirweho ekkitongore ky’eby’amagara nk’okunaaba engaro na sabuuni, okujwara mask okutantara okwehisya abantu baingi n’endiijo miringo.

Dr. Peter Ssebutinde, Christine Ayebazibwe (URCS) na Kiiza Robert, Ceyamaani wa Bus Park n’abataka ba Bus Park Mbarara ahahururu y’okunaaba omungaro enshumi nkye ehweire

“Bwanyima y’akakooko okuguma nikahinduka, amahanga agandi nka South Africa batungire encuro endiijo ebataahiriire ey’akakooko corona kandi ekiri omumahanga agatuhereire nka Kenya na Tanzania kyo tikirikwetaagwa n’okugambwaho,” nikwo Dr. Ssebutinde arikugira.

Wiiki egi erikwirira kuhwa, purezidenti wa Kenya, Owek. Uhuru Kenyatta, acweiremu kukingaho entambura zoona ezirikutaaha omururembo Nairobi hamwe n’agandi mashaza 4 bwanyima y’endwara ya corona kweyongyera ekaza aharurengo oru ebaire etakahikire omu ihanga eri eririkukizayo obugaiga omumahanga bugwa-izooba bwa Afrika.

Purezidenti ayihireho okuza ahamashomero, omumabaara kandi yaagaruka yakyendeeza n’ahashaaha ezi abantu bashemereire kuba bari aheeru.

“Ninyenda kwijusya abanya Mbarara ngu naitwe twayekwata ijaga; tukeebwa okujwara mask, okunaaba omungaro hamwe n’okwirira hare na bataahi baitu, encuro eyakabiri neija kutukora kubi,” nikwo Dr. Ssebutinde arikwongyeraho.

Ebi Dr. Ssbutinde abigambire wiiki egi obu abaire nahwera ab’ekitongore ekirikuha obuhwezi bw’aho n’aho ahabantu abarikuba abahikirweho akabi ahamagara gaabo ekya Red Cross Society omuri Mbarara kuha abantu b’omukatare ka Central Market hamwe n’aba omu takisi paaka ebintu by’okunaabiramu engaro batakataahire omumyanya egi.

N’obu eihanga riraabe ritungireho gumwe ahamibazi y’okusirika akakooko ka Corona ogwa Astra-Zeneca, Dr. Ssebutinde naagira ngu okusirikwa tikirikumanyisa ngu nooba otarikubaasa kujanjaaza akakooko aka. “Waaheza kuteeza ekikatu eki, gumizamu orikwerinda, onaabe engaro, ojware mask yaawe kandi otakaguma noyirira haihi n’abantu baingi. Ebyo ku turaabikore, encuro endiijo eya kabiri nituza kugyerinda ahabw’okuba teri hare,” Dr. Ssebutinde nagumizamu n’okurabura.

Kiiza Robert, orikwebembera paaka omuri Mbarara bwanyima y’ehururu egi ashabire abantu boona abarikukoresa obuheereza bw’omwanya ogu okuhurira ebiragiro by’ab’ekitongore ky’eby’amagara, bakanaaba omungaro omukugyezaho kwerinda endwara egi.

We Christine Ayebazibwe hoona orikukurira Uganda Red Cross Society eitaagi erya  Mbarara naagira ngu, “obuhwezi n’obw’okuhiga abantu abu barikukoresa emyanya egi kugumizamu n’omucwe gw’okuguma nibanaaba omungaro batakataahire omunyanya egi ahabw’okuba itwe nitumanya ngu #COVID19 eriho kandi neyita.”

Dr. Ssebutinde naagira ngu nka disiturikiti ya Mbarara haine ebikoreso ebindi boorekyereire kutunga kandi nibateekateeka kubita omumyanya endiijo ei barikumanya ngu nihazamu abantu baingi nk’obutare, omubaasi paaka, takisi paaka hamwe n’ebyombeko ebirikuzamu abantu baingi.

LEAVE A REPLY