Nyamityobora nehaya kugaruka omu UPL

1256
0
SHARE

N’ebya Aloysius Byamukama

Kiraabu za FUFA Big League nizitandika kuhayana omumpaka z’abarikuza kutemba kuza omumpaka eza Uganda Premier League nynencakare orwakana ebiro 25 okwezi oku bwanyima y’okukora okwetebeekanisa kw’amaani obwo siizoni y’omwaka 2021 erikwirira okutandika bwanyima  y’aba FUFA okuguma nibagyongyezayo emirundi mingi ahabw’ebiragiro ebyareetsirweho endwara ya Corona.

Nk’empaka n’emizaano endiijo omu ihanga ryona, siizoni ya Big League ey’omwaka 2021 ekashazibwamu ahabwa endwara ya Corona kandi aho niho kiraabu eya UPDF na MYDA zaatungyeire okutembesibwa kuza omu Uganda Premier League kandi na bwanyima Kitara FC bwanyima y’okuzaana emizaano y’okucwamu araaze omumwanya gwa tiimu ya kashatu erikuza omu Uganda Premier League. Okuremba kwa kiraabu ezi omu Uganda Premier League kukareetwaho Nyamityobora kushanga yazaanireho ebicweka 75 ahari 100 eby’emizaano y’empaka za FUFA Big Leagueobwire obwo nk’oku ebiragiro by’engyenderwaho ya FUFA birikugira

Kooki omusya owa Nyamityobora Richard Makumbi nayikiriza ngu tiimu ye neija kugaruzaho ekitiinisa kyayo eki yaabeire eyine ku eraabaase kuza omumpaka za kiraabu z’orurengo orw’okubanza orw’ihanga

“Tweteekateekire kandi twetebeekaniise kutandika orugyendo ruraingwa. Abazaani abu nyine baine omutindo ogw’ahaiguru kaandi nibabaasa kutembesa kiraabu omumpaka ez’ahaiguru,” Makumbi nikwo agizire.

Beitu n’obu araabe atabishoboroire kurungi, Makumbi agambireho ahabizibu ebi kiraabu eyine ebi arikugira ngu babikwatsize aharubaju reeru babaanze baamara ekigyendererwa eki.

“Twine ebizibu bingi kwonka ebyo titurabigambeho itwe abatendeki turi abebembezi. Ekigyendererwa kyaitu n’okureebeka ngu twakora kurungi n’obu turaabe twine ebizibu ebi,” nikwo ayongyeireho

Makumbi, hoona orikumanywa munonga ahabw’okutembesa kiraabu agyerizeho aha kiraabu nkye omumpaka za Premier League kwonka ahwereire kiraabu nyingi kutemba omu Premier League obwo kiraabu eyamuremire eitembesa eri Kiboga Young obwa hati erikumanywa nka Mbale Heroes abaasingirwe Kitara FC goora 1 ahari busha omuri kamariirizo w’empaka z’okutemba omu Premier League omwaka oguhwaire.

Kiraabu nka SCOUL FC, Iganga Town Council, Mukono Lions, Buikwe Red Stars, Bunamwaya obwa hati erikumanywa nka Vipers SC, BUL, UTODA Mityana, Soana (Tooro United) hamwe na Mbarara City zoona zikatemba omu Premier League obwo Makumbi ari omutendeki waazo omukuru.

Nyamityobora obwa hati erikureebeka busya eine abazaani basya ab’amaziina nka Johnson Turinawe owaarugire Kigezi Home Boys, Wahab Luwaga kuruga omu Doves FC, Kyandiga Sharif Muhamad kuruga omu Kansai Plascon n’abateebi nka Gerald Kimuli na Fauzi Ismail kuruga omu New Villa n’abandi.

Kyandiga Sharif Muhamad n’omwe ahabazaani abasya abu Nyamityobora erikuza kusheruza obusinguzi oburagitware omu Uganda Premier League

Okurugiirira ahaku tiimu ezi ziraakwatane, emizaano ya siizoni ya Big League netandika eriizooba orwakana kandi tiimu 8 zoona omubikoosi 2 niziija kuba niziriitana obwo Nyamityobora erikukwatana na Ndejje University.

Nyamityobora bari omukikoosi kya Rwenzori na bataahi baabo abu batuura nibareeguurana kumwe aba Tooro United, Kigezi Home Boys n’abaiziremu busya aba Tiles and Terrazzo kandi bo abaabaire bari omu Premier League abarimu Proline FC, Ndejje University na Water FC nabo bari omukikoosi ekirikwijuza tiimu zoona ez’ekyanga ekya Rwenzori omu FUFA Big League.

Arua Hill FC, Calvary FC, Black Power FC, Kiboga Young, Gaddaffi FC , Kataka FC n’ababeire bari omu Uganda Premier League aba Paidha Black Angels na Maroons FC nibo bari omukikoosi eky’ekyanga ekya Elgon. Proline na Tooro United abaashazirweho omu Uganda Premier League siizoni ehweire nibaija kutandika kurinda oku baakubaasa kugaruka oruguru obwo barikuzaanira omuka owaabo barikukwatana na Kigezi Home Boys na Water FC nk’oku barikukuratana batyo reeru bo aba Maroons, kandi hoona tiimu endiijo eyashazirweho omu Uganda Premier League, nibataayisa Paidha Black Angels omuri Luzira.

LEAVE A REPLY