Tuhami, n’obu Aucho araabe atariho – Kooki Mubiru

988
0
SHARE



Omutendeki wa tiimu y’omupiira gw’ebyere ey’ihanga kandi hoona ow’akaanya-bwanya Abdallah Mubiru, ayorekire ku aine okuhama kw’amaani ahabw’okugira abandi bazaani abu aine obwo enshonga ezeetooroire omuzaani ow’enyima Khalid Aucho zirikutuuza.

Aucho akabingwa omunkambi ya tiimu y’ihanga eya Uganda Cranes bwanyima y’okuremwa kwikirizana n’emicwe n’emitwarize ya tiimu egi. Ekibiina ekirikukurira omupiira gw’ebigyere omu ihanga ekya FUFA kimanyiise ku Aucho yayangire kutemba entambura eyaabeire eteirweho kumwiha Entebbe ahakishaayi ky’enyonyi kwegaita ahankambi y’abazaani b’eihanga kandi taragiire n’omunkambi egi kuruga obu yaahika omu ihanga.

Hoona Mubiru nagira ngu baine abazaani abarikubaasa kuza omumwanya gwe obwo Uganda Cranes erikuzaana emizaano ya Burkina Faso na Malawi omuka hamwe n’ahi eraabe etaayayire. Kandi hoona nabwo Aucho akaba atari n’ow’okuzaana omupiira gwa Burkina Faso ahabw’okuba akaba abingirwe enyimaho.

“Twine abazaaani baingi abu turikubaasa kureeberaho Aucho yaaba atariho. Obu twabaire nitweta ekikoosi ky’abazaani eki, tukaba nitumanya ngu haine ebirikuza kututeganisa nka Covid kandi tukaba nitweteekateekyera okutaho ondiijo omuzaani haagira ekyabaho. Nitwikiriza ngu nitwija kugyenda n’abo abu twine obwa hati kandi ku orikureeba okubeteekateekire, n’amazima beeteekateekiire empaka ezi,” nikwo Mubiru agizire.

Mubiru eki akigambire obwo Uganda Cranes barikutendekwa omurundi gw’okubanza orwamukaaga ahakishaayi Lugogoobwo barikweteekateekyera omuzaano gwabo na Burkina Faso oguraaabeho orwakashatu ahakishaayi kya St. Mary’s, Kitende hamwe n’omu ihanga rya Malawi ebiro 29.

Bwanyima ya Aucho kubura omu tiimu egi Mubiru hati naija kutwara omuzaani Tadeo Lwanga kuza omubigyere bya Aucho.

N’ekyamazima Lwanga nabaasa kuba atazaanire mizaano mingi ahatiimu y’ihanga nka Aucho, hoona abeire ari omutiimu y’ihanga kandi naamanya enkora yaayo. Na nyine akaba ari tiimu ya Uganda Cranes eyabeire eri omuri Misri omugwa 2019 obu bahika ahari kamariirizo z’empaka z’ekikopo ky’amahanga ga Africa

Lwanga atwire nazaanira tiimu rurangaanwa eya Simba SC omuri Tanzania kandi egi n’emwe ahanshonga ezirikureetera yaatooranwa kuzaanira tiimu y’ihanga.

Bwanyima y’okutwara kiraabu ya Simba aharurengo rwa tiimu 8 omumpaka za kiraabu z’omuri Africa, eki kibaire kimwe ahabintu ebirikumuha amaani obwo Uganda Cranes barikusherura obusinguzi oburikubaasa kubatwara omuri kamariirizo z’empaka z’amahanga ga Afrika omurundi gwa kashatu ezikurataneise. 

Lwanga oraabe nahwera-hwerana na Michael Azira barikuzaana rwagati y’ekishaayi agarikire ahari Kitende ahi yabaasize kukuriza entaranta ye atakagiire kuzaana omupiira ogurikumushashuza.

Burkina Faso eyebembeire ekikoosi ekya B n’obubonero 8 ahi erikukiza Uganada akabonero kamwe . Malawi eri omugwa kashatu n’obubonero 4 kandi Sudan ey’amashuuma eri omumwanya gwa 4 n’obubonero 3.

LEAVE A REPLY