“Tihaine orasingye Mwine Mpaka omukyanga kyangye,” CM Ahamada

475
0
SHARE


Evans Atwine, Kakoba
Abateezi b’akaruuru omuri ya Nyakaizi, omu Diviijoni ya Kakoba, omururembo Mbarara nibetomboitira ceyamani w’entebe y’okubanza, Timanywa Ahamada, ahabw’okwanga kubaheereza obupapura oburikworeka ah’okuteerera oburuuru (Voter Location Slip) ahabw’okugira ngu tibarikuha bushagiki ab’eby’obutegyeki abu Ceyamaani arikushagika.

Mayanja Andrew, omwe aha bateezi b’akaruuru yaagira ngu akwatsire omuhanda yaaza owa Ceyaamani kwihayo akapapura kye baitu ku ahikireyo yaatandika kumubuza ou arikuhagira kandi ku ayangire kumugambira nawe nikwo kusharamu akanga kukamuheereza.

Mayanja agizire ngu Ceyamaani amugizire ngu yaaba atamugambeire ahagati ya Mwine Mpaka, okwatsire ebendera y’ekibiina kya NRM kuba Meeya w’orurembo Mbarara omumashuuma hamwe na Emmy Mbareebaki, oyetsimbireho nk’oteine kibiina, tarikwija kumuheereza akapapura kandi n’ah’izooba ry’akaruuru tarikwija kumwikiriza kuteera akaruuru
Denis Muzamir, Ahamwe Christopher, Aula Mayanja n’abandi nibashaba akakiiko k’eby’oburuuru okugaruza eby’okwiha obupapura obu aha muruka kutari kuza omu maka ga Ceeyamani LC1 ngu ahabw’okuba tibarikumwesiga.

Ceyaamani agizire ngu we yaaba nahagira omuntu tarikweshereka kandi ekibiina kya NRM kikahinguza ngu bahagire okwatsire ebendera. Ashoboroire ngu omukyanga kye, Mwine Mpaka omu karuuru k’ekibiina, akaihayo obuuru 701 kandi Emmy Mbarebaki akatungayo oburuuru 112. Ngu kandi n’aha murundi ogu, Mwine Mpaka naakusingira ahaiguuru hamwe na Yoweri Kaguta Museveni.

Ceeyamani oshangirwe omu maka gye ari omukutereeza obupapura obu ashoboroire ngu Mwine Mpaka akozire ebintu bingi omuri Kakoba atakabaire na MP ngu mbwenu tihariho muntu n’omwe ou arikuza kwikiriza kumusingira omukyanga kye.

Ngu abari okwetomboita abingi naakimanya ngu n’abahagizi ba Emmy Mbareebaki oyetsimbire na Mwine Mpaka abarikwenda kuteganisa eby’oburuuru n’ekigyendererwa ky’okubwiba.

Agizire ngu omu sero kya Nyakaizi harimu abateezi bakaruuru abarikuhiika omu 3000 kandi abantu 2500 baaherize kutwara obupapura bwabo. Okurugiirira ahari Violet Atuhurira, orikukurira eby’oburuuru omu Disiturikiti ya Mbarara, omurimo gw’okugaba obukongi obu n’ogw’ekitongore kya Electoral Commission batari ba ceyaamani b’ebyaro.

Yashoborora ngu abakozi b’ekitongore kyona nibaija kwetwa beshobororeho nk’oku ba Ceyaamani bahairwe emirimo eshemereire kuba n’ekorwa ekitongore ekirikukurira eby’oburuuru.

#WestUpdates

LEAVE A REPLY