Abakazi 13 nibenda eya Mbarara City

333
0
SHARE

Evans Atwine, Mbarara

Akaruuru k’okuronda omwebebembezi w’ihanga hamwe na ba memba ba paramenti ahabw’encuro ya 2021-2026 kariyo nikairira haihi, ba memba ba paramenti abaingi nibakwata ni biragara ahabw’omubaro gw’abantu abatsya abarugireyo n’ekyetengo ky’okutwara entebe zaabo ezi barimu.

Ahi turikugambira ebi, abakazi abarikwingana 13 kuruga omu bibiina by’obutegyeki bitarikushushana nibo baaherize kurugayo kwemuruka nk’oku barikwenda entebe y’abakazi eya Mbarara City omu karuuru akariyo nikairira haihi.

Abakazi abarikuruga aha rubaju rw’ekibiina ekya National Resistance Movement (NRM) barimu; Atukwasa Rita Bwahika, Ayebare Anita Kasyata, Ainamani Brendah, Kyomugisha Donah, Dr. Patricia Kabahango, Emma Boona owaajwekyeireho Mbarara Disturikiti encuro ibiri, Jolly Tumwine Kagira obaire ari omuhandiiki mukuru w’akakiiko k’eby’amagara n’emituurire y’abantu (Health & Community committee ), Bonnie Kiconco Kashaija muhara wa Emmanuel Kashaija, ekikongi ky’ekibiina kya Democratic Party (DP) omuri Mbarara, Natukunda Annah (DEAR), Kellen Ayebazibwe hamwe Clare Ekiyasiimire Chopper otweire ari omunyamakuuru rurangaanwa omuri Mbarara.

Abakazi abarikuruga omu bibiina ebirikuhakanisa gavumenti barimu; Atusasire Agatha kuruga omu kibiina kya Forum for Democratic Change (FDC) hamwe na Irene Kajumba owa People Power ninga shi omu kibiina ekitsya ekirikumanywa nka National Unity Platform (NUP) ekirikwebeebemberwa MP Robert Kyagulanyi ou bingi barikumanya nka Bobi Wine.

Enshonda omu by’omutegyeki nizoreeka omuri Mbarara nizooreka ngu omubaro gw’abantu baingi abasya abataahire omuby’obutegyeki okukira munonga aha ntebe y’abakazi nigwija kutuubya emigisha y’ab’eby’obutegyeki abatweireho okusinga akaruuru aka.

Omukazi orikujwekyera Mbarara Disiturikiti na Mbarara City ogitwariremu ni MP Rosettie Mutambi Kajungu oyorekire nk’oku atarikwenda kugaruka omu karuuru ahabw’enshonga zitari zimwe na zimwe.

Ahabw’enki MP Mutambi Kajungu atarikwenda kugaruka?

Arikugambaho n’omunyamakuuru waitu kurabira aha siimu, MP Kajungu agizire ngu akaruuru okuhinduka eby’obushuubuzi (commercialized politics) n’emwe omu nshonga eziriyo nizimugyemesereza okuruga omu by’obutegyeki.

Ashoboroire ngu akaabaire naakunda okuheereza abantu be n’ihanga rye kwonka oburi bw’enguzi bumuremeise.

Ayorekire ngu enshonga ereetsire oburi bw’enguzi bwayeyongyera n’okuhindura eby’obutegyeki nk’eby’obushuubuzi kandi we nk’omuntu orikukunda eihanga rye atarikubasa kugumisiriza. Ayorekire ngu ariyo naatebeekanisa okweta orukiiko rw’abanyamakuru okumanyisa ensi yoona ebiri omu by’obutegyeki by’eihanga kandi n’ekiriyo nikibimwihamu.

Amaani garahi omu bakazi abetsimbire?

Okurugirira ahaby’eby’obutegyeki bya Mbarara kutandikira kimwe enyima, amaani amaingi gari ahagati ya Atukwasa Rita Bwahika, Bonnie Kiconco Kashaija hamwe na Emma Boona n’obu bukiri kare kumanya oraasingye n’otarasingye.

LEAVE A REPLY