Mutandikye ebigombe by’okwebikira ahabwa nyensya – Minisita Kasolo

166
0
SHARE

Christopher Ahimbisibwe

Minisita w’eby’esente Kyeyune Kasolo agizire ngu gavumenti omu bwire bukye neza kuba yahinguza eiteeka eriraabe nirigyema abanya Uganda boona na munonga abarikwekorera emirimo yaabo, kutandika kwebiikira aka sente omu banka z’ebyaro.

Minisita nayoreka ngu n’obu Gavumenti egyerizeho omumiringo yoona kuhwera abanya Uganda kuruga omu bworo obwe erikurabira omu puroguraamu zayo nka; Youth Livelihood Program, NAADs, Operation Wealth Creation, Women Empowerment Program hamwe n,ezindi, tikiremeise banya Uganda kuguma omu bworo ahabw’obutagira bukugu bw’okwebiikira sente.

“N’ahabw’ekyo nitwenda kutaho eiteeka eriraabe nirigyema buri munya Uganda wena kuba memba omu banka z’ebyaro ninga ebigombe by’okubiika sente. Oraabe aine kaadi y’okubiika sente niwe araije kuganyirwa omu puroguramu za gavumenti,” Minisita Kasolo nikwo arikugira.

Ebi byoona Minisita Kasolo abigambire obu abaire natongoza purojekiti erikumanywa nka; Emyooga Presidential Initiative’ omu Disiturikiti ya Ntungamo na Rwampara eraije kuhwera abantu kweiha omubworo hamwe n’okuhangaho emirimo.

Purojekiti egi “ Emyooga Initiative” ekatongozibwa mukuru w’eihanga Yoweri Museven omwaka oguhwaire, n’ekigyendererwa ky’okuhwera abanya Uganda abarikukora emirimo eya buriijo.

Purojekiti egi nezakuhwera abanya Uganda baingi abarayegaitire omu banka z’ebyaro, ahu ebibiina 18 kuruga omuri buri ishaza niziija kuganyirwamu. Omu Gurupu 18 eziraganyirwemu harimu; ba kirinju, abarikutambuza ebintu omubutare, abajubi, abanyamakuru, abavugi ba bodaboda, abavugi ba Tax, ababeizi, abakyara abashuubuzi, abeshongozi, abarikukoma amashokye, hamwe n’aba za hoteeri.

Buri banka ninga guruupu neza kuba netunga miriyooni 30 kandi bo abazirwanireho nibaza kuba nibatunga miriyooni 50. Eki nikimanyisa ngu buri ishaza niriza kuba niritunga sente zirikwingana miriyooni 560. Sente ezi niziza kuba niziteekwa aha akawunti ya banka ninga guruupu bwanyima y’okuhikiiriza byona ebirikwetengwa nka okuhandiikisa ekigombe kyabo hamwe n’abarimu.

Banka ezi niziza kuba ziine ebigombe ebindi eby’aharurengo orw’omuruka aharaabe harimu ba memba batari ahansi ya 7 kandi batarikurenga 30. Purojekiti egi neza kuba nereebwa kandi erikukuratirwa ba RDC’s obwe barikukwatanisa na ba Microfinance Support Centre (MSC),obwe erikukwatanisa na Minisiture yeby’esente embariira hamwe n’entunguuka (Ministry of finance,Planning and Social Development)

LEAVE A REPLY