2 bakwatsirwe n’embundu y’ekicupuri barikwenda kwiba owa Boda

327
0
SHARE

Evans Atwine, Mbarara

Pooriisi omuri Mbarara eine omunkomo yaayo omushaija orikumanywa nka Byaruhanga Godfrey, kuruga omu gomborora ya Nyakitunda, Isingiro Disiturikiti ahabw’okushangwa n’embundu y’ekicupuri arikwenda kwiba owa boda.

Okurugiirira ahari Samson Kasasira, omugambirizi wa pooriisi omu kicweka kya Rwizi, Byaruhanga akwateirwe omuri ya Nkokonjeru, Kamukuzi, Mbarara City arikugyezaho kwiba omuvugi wa boda aha shaaha 11 n’edakiika 40 z’omu kasheshe.

Byaruhanga orikwetwaramu nk’omuvugi w’ebitookye omu tauni ya Mbarara akwateirwe omu kikwekweto kya Pooriisi eky’ebiro 15.07.2020. Kandi Byaruhanga yaaba aine omushaija ondiijo owamanywa nka “Dogo Black” orikugambwa kuba niwe arikukurira ekikoosi ky’abashuma abarikwejunisa embundu z’ebicupuri omuri Mbarara.

Baitu okurugiirira ahari Kasasira, we Dogo Black atorokire yairuka yabatsiga.
Pooriisi okuteekaho ekikwekweto eki, ni bwanyiima ya abatuze kuruga omu sero ya Boma, Kakyeka hamwe na Nkokonjeru kuguma nibatwarayo okwetomboitwa kwabo nk’oku abashuma b’embundu babanyagariize n’okubataahirira omu bwire bw’ekiro bakabaiba.

Atukwatse Sheila, omwe omu bataka ba Nkokonjeru agizire ngu abataka baingi babaire baatandikire kugyemeserezibwa okwekingirana omu maju gaabo bukiri kare ahabw’okutiina okutaahirirwa abashuma b’embundu.

Lt.Col. James Mwesigye, omujwekyerwa wa Purezidenti omuri Mbarara ashabaire abantu okuguma nibamanyisa ab’eby’okwerinda buri kaire baaheza kureeba abantu abu barikwekyengyera nainga abu batarikumanya omu kicweka kyabo. Ngu kandi baaguma nibakora eki, nigwija kuba omuhanda gumwe gw’okurwanisa abahenzi b’ebiragiro omuri Mbarara.

Ashabire bakuru b’ebyanga okuhandiikisa abataka baabo kibahwere okubinga enkozi z’ebihagaro omu bicweka byabo ebi barikwebeembera.

Byaruhanga Godfrey atweirwe aha pooriisi ya Mbarara Central Police station obwe Pooriisi erikugumizamu erikuhIiga bundi-nuuma Dogo Black otorokire. Omushango gw’okugyezaho kwiba (Attempted Robbery) guri aha fayiro namba SD Ref 03/15/07/2020.

LEAVE A REPLY