Omushuma yaakwatwa naitirwaho – Capt JB Tumusiime

260
0
SHARE

Evans Atwine, Mbarara

Pooriisi omuri Mbarara eriyo nehiiga bundi-nuuma omushaija orikumanywa nka Mwesigye Alex ahabw’okuteeberezibwa kuba abaire ariyo naiba Ente 2 z’enjungu ezirikubarirwamu sente zirikwingana miriyooni 4 omu za Uganda.

Okurugiirira ahari Kasasira Samson, omugambirizi wa pooriisi ahabw’ekicweka ekya Rwizi, Alex akairukanga yaasiga pooriisi n’abantu ba buriijo ab’omukyaro kya Nyarubanga, Mbarara City ahi bamushangire ari na bataahi be bari omu kwiba ente z’omutaka orikumanywa nka Kanamanywa Rogers 41 aha rwamukaaga ebiro 11.07.2020 omu bwire bwa shaaha 9 z’ekiro.

Kasaasira agizire ngu nka Pooriisi bari hamwe n’abataka, babaasize kukwata abashaija 3 naabo abarikuteekateekwaho kuba bari abashuma b’ente abarikumanywa nka Mukago Daniel, Mubangizi Geofrey ou bingi barikumanya nka “Doctor” hamwe na Nuwahereza Benon baitu we Alex akabasiga enshonga ahabw’enki bari omukumuhiga.

Nuwahereza Bonon omwe omu bakwatsirwe, nibwo abaire amazire akaire kakye arugire omu kihome Nyamushekyera ahi abaire atweire ahabw’emishango niyo emwe ey’obushuma.

Okurugiirira ahari Kasasira, abashuma aba babaire nibatamburira omumotoka y’ekika kya Toyota wish namba UBF 859K y’omubazi gurikwera.

Mukago Daniel, Mubangizi Goefrey hamwe na Nuwahereza Benon barindiirwe aha Pooriisi Mbarara na motoka yaabo ei babaire nibatamburiramu.

Beitu okukwata abashuma aba ni bwanyima ya Rogers mukama w’ente kuhurira abantu omu rugo rwe rw’ente nawe akamanyisa abataka na pooriisi kandi ku bagyeire kuhika omu rugo bashanga Ente 2 baheerize kuzikomamu emiguha bariyo nibakuzita omu motoka nikwo kubakwata baitu we Alex akairuka akabasiga bakakwata bashatu.

Abakwatsirwe baiguriirwe orubanja aha fayiro namba SD ref 02/11/07/2020.

Ceyaamani wa Disiturikiti ya Mbarara, Capt. JB Tumusiime Bamuturaki arabwire abantu okwetantara obushuma okukira munonga obw’amatungo ngu ahabw’okuba hati ou baraagume baakwata, n’okumwitiraho hatariho kwebuza aha muntu n’omwe ahabw’okuba bagaangize abantu.

LEAVE A REPLY