Manchester City yasinga omushango ogw’okuzaana Champions League.

166
0
SHARE

Kooti y’emishango y’eby’emizaano yaikiriza Manchester City okuzaana bwanyima y’okusinga omushango ogu yahababire bwanyima y’okushazibwamu obutazaana Champions League okumara emyaka 2.

Manegya wa Man City, Pep Guardiola atuura aine amatsiko arikumanya ngu nibaija kusinga omushango ogu.

City ekazibirwa okuzaana champions League emyaka 2 hamwe n’okushashura sente zirikwingana miriyooni 30 eza Euro omukwakabiri bwanyima y’okugambwa kuba yahenzire ebiragiro ebirikuzibira za kiraabu okushohoza sente ezirikukira ezi zirikwiha omumupiira.

Okurugiirira ahabiragiro bya UEFA ebirikumanywa nka Financial Fair Play Regulations tiimu zishemereire kuba nizikoresa sente n’amagoba agu zirikwiha omumupiira kandi okwenda ngu zitakoresa sente ezirengire ekirikubaasa kureetera zaaremwa bizinensi y’omupiira omubwire bw’omumaisho.

Ku harikubaho okutamu sente nyingi omumupiira, nk’okugura abazaani ahamihendo erikutangaaza, kiraabu neeba eine kushoboorora omuringo ogu sente nyingi zityo zirikutaaha omukiraabu egyo hamwe n’okuhamya ku sente ezo zitarikuhenda kiraabu egyo.

Manchester City ekatabaarizibwa kandi omukwakabiri yaazibirwa okwetaba omumpaka za UEFA Champions League kumara emyaka ebiri ahanshonga egi beitu bakahayo okujurira kandi eizooba rya mbwenu nibwo omushango gwabaihwaho

Hati obu Manchester City yaikirizibwa kuzaana Champions League siizoni erikwija, za ziraabu 4 eziramarire aha mutwe gwa Premier League nizo zirayetabe omumpaka ezi.

Kiraabu ezirahereze omumwanya gwa 5 hamwe n’ogwamukaaga omu Premier League niziija kuhayahanira okuzaana empaka za Europa League. Oteireho na kiraabu n’obu eraabe etari omu tiimu 6 eziri ahaiguru y’ekimeeza kya Premier League kwonka yasingura ekikopo kya FA naayo neyetaba omumpaka ezi.

LEAVE A REPLY