Ez’eitaka ry’akatare ka Koranorya ziimukire busya

135
0
SHARE

Evans Atwine, Mbarara

Abashuubuzi abarikukorera omu katare ka Koranory abarikurenga 1000 barikwebemberwa Ketty Byaruhanga kandi bakwataneise n’orikwebembera Diviijoni ya Kakiika , Gumisiriza Kyabwisho, Kambamu Francis LC 2  n’abandi baimukize orutaro ahari Ceyamaani w’ekibiina kya NRM ahabwa diviijoni ya Kakiika Benon Mugume barikumuvunaana okwiba eitaka ry’akatare ka Koranorya.

Ekireetsire enshonga ezi okwimuka busya ni bwanyima y’abashuubuzi kwesharinga, enshumi nkye ehwaire barikufa omwanya gw’okwombekaho obuduuka omunda omu katare ekireeteire na pooriisi yaataaha omunshonga ezi.

Okurugiirira ahandagaano z’ebiro 26.11.2011, Mugume Benon akagura eitaka eri kuruga aha mugyenzi Mukasa Sulaimani aha sente ezirikwingana miriyooni 88. Endagaano n’eyoreka ngu aha miriyooni 88, Benon akabanza yaashashuraho sente ezirikwingana miriyooni 81 ez’oburiho kandi sente ezindi miriyooni 7 akazishashura ebiro 05.04.2012.

Ceyamaani Kyabwisho n’abashuubuzi boorekire ngu endagaano ei Mugume aine n’ekicupuri ngu ahabw’okuba n’abaana b’omugyenzi Sulaiman Mukasa abarimu Wasswa Siraje, Mukasa Afusa, Bakikaru Rosette hamwe na Naila Namatovu  abaarekirweho okureeberera eitaka ry’omugyenzi  boorekire ngu  Benon tibarikumumanya  ngu ahabw’okuba n’ishe arikuza kufa tarabamanyise ngu aine eitaka eri yaagurize Mugume Benon.

Kyabwiso ayongyeire yagira ngu omuntu t’orikubaasa kushashura omuntu sente miriyooni 81 omungaro reero miriyooni 7 zonka okaba nizo warababiza omu banka, orikwenda ngu batakazimwibaho.

Eitaka eririkugambwaho riri aha Poroti 5, Burooka 39 Kashari kandi nirishangwa omu kyaro kya Rwebiihuro omu diviijoni ya Kakiika, omu Munisiparite ya Mbarara. Eitaka eri niryo ry’ombekirweho  akatare ka Koranorya.

Okunyurura omuguha okutweire ah’itaka eri.

Ti Benon wenka orikurwanira eitaka eri, baitu hariyo ekibiina ekindi ekirikumanywa nka Rwebiihuro Land Owners Association abarikugira ngu nabo eitaka n’eryabo. Enshonga z’eitaka eri yoona zikiri omu kooti  n’obu orutaro rwimukire ogundi murundi.

Timurundi gw’okubanza Mugume Benon arikujunaanwa ogw’okwiba amataka. N’obu yabaire ari Ceyamaani wa divijoni ya Kakiika omuncuro ehweire, nikigambwa ngu  akaguza amataka maingi ga Diviijoni.

Benon ahakanise amakuuru agarikugira ngu nayenda okwiba eitaka eri ahabw’okuba ngu omuntu tarikweyiba.

LEAVE A REPLY