Enshonga ahabw’enki akatare ka Central Market kakiremirwe kuhwa

384
0
SHARE

Evans Atwine, Mbarara

Omurimo gw’okwombeka akatare ka rwagati aku baingi barikumanya nka Central Market gwongyezibweyo ahabw’eshonga y’okubarukaho kw’endwara ya #COVID19 okwetooroora ensi yoona otwariiremu n’eihanga rya Uganda.

Kampuni ya ROKO Construction Limited niyo yakwatsiibwe omurimo gw’okwombeka akatare aka. Omurimo gukatandika omu kwezi kwa kabiiri omwaka 2018 kandi gukaba guri ogw’okuhwa ebiro 14 by’okwezi kwa kabiiri omwaka ogu 2020.

Baitu aba ROKO bakaija bashaba ku bongyezayo obwire bw’ameezi eshatu omu maisho okuhisya omukwezi kwa kataano 2020 baitu obwire obwo nabwo buhweireho omurimo gutakahweire.

Meeya Robert Mugabe Kakyebezi ashoboroire ngu n’amazima aba kampuni ya ROKO bakabashaba okubyongyera obwire bw’ameezi 3 omu maisho kwonka ku babaire baaheza kubongyera obwire obu nikwo kubarukaho endwara ya COVID-19 ecumbagiize emirimo yoona.

Ayorekire ngu ebirikwejunisibwa byona omukwombeka akatare aka tihaine ei byabaire nibibaasa kugurwa ahabw’okugira ngu purezidenti Yoweri Kaguta Museveni akakingaho amaduuka g’eby’okwombekyesa (Hardware) okwetooroora eihanga ryona nk’omuringo gumwe gw’okuzibira akakooko ka “Corona Virus” kujanjaara omu bantu.

Tauni kiraka Theophilus Tibihika agizire ngu omurimo gugarukiremu guriyo nigugyenda omu maisho ngu kwonka tibarikumanya ahi gurahwere kandi ashabaire abashuubuzi okugyenda mpora aha nshonga z’akatare aka.

Aha ky’okwongyera aba kampuni ya ROKO obwire ashoboroire ngu omumateeka ga za tenda, nikikirizibwa ekikuru  kampuni yaayoreka enshonga ahabw’enki erikwenda bagyongyere obwire.

Ceyaamani wa abashuubuzi b’omukatare ka rwagati, Nyombi Muhammad, agizire ngu endagaano yaabo obubaaherize kugihenda, hati nibenda bakore omurimo murungi, obwire ku buraahikye  bw’okubakwatsa akatare kabo, bashangye buri kimwe kiri omu buteeka hatariho rwekwatso yoona.

Sente eziri omu kwombeka akatare aka ni rooni kuruga omu African Development Banka (ADB) eyahairweyo kurabira omu gavumenti ya Uganda erikurenga biyooni 23 omu sente eza Uganda.

Akatare aka akarikukwata ahanguuto ishatu z’etauni ya Mbarara ezirimu Mbaguta, Bishop Wills na Buremba kaaba kaahweire ,niko karaabe kari akatare kahango konka omu kicweka kya Ankore ekirimu za Disiturikiti 12 ezirimu Mbarara, Sheema, Bushenyi, Isingiro, Kiruhura, Rwampara, Kazo, Ibanda, Rubirizi, Mitoma, Buhweju na Ntungamo kandi nikaija kuba kari aha rurengo rwa akatare ka Mpanga Market akarikushangwa omu tauni ya Fort Portal, omu disiturikiti ya Kabarole.

LEAVE A REPLY