Oku Mbarara eyeteekateekire kwakiira City

563
0
SHARE

Evans Atwine, Mbarara.

Okumara obwire buringwa abeebembezi ba Munisiparite ya Mbarara barikushaba n’okwetebeekanisa okuba city, ekirooto n’eshaara  zaabo birugireho  byagarukwamu. Mbarara City n’ey’okutandiika omu butongore  ebiro 01.07.2020.

Mbarara nirwo rurembo ruhango orwa Burengyerwa-izooba kandi orurembo  erikugaita eihanga rya Uganda na Rwanda omu by’okutambuza eby’obushubuzi.

Meeya w’orurembo oru Robert Kakyebezi ayorekire ngu Munisiparite yaaheerize kuhikiiriza buri kimwe ekirikwetaagisibwa okwakira City kandi beteekatekire ekirikumara okwakiira City omubutongore.

Munisiparite egi n’emwe omundembo 15 ezihinguziibwe eishengyero ry’ihanga aha biro 28.04.2020 barikugyendera aha ngyendererwaho y’eihanga (Constitution) “Article 179(1) (A)” hamwe n’ebiragiro ebirikutegyeka gavumenti z’ebyanga ebirikumanywa nka “Local Governments Act” akacweka (Section) ka 7 (2a) “CAP.243”.

Kakyebezi   ashoboroire ngu ebiro 30.06.2020, nibaija kushaba Pooriisi okubaikiriza okutambura okwetooroora Divijoni 6 zoona eza Munisiparite barikworeka okushemererwa n’okwesiima   barikwakira City omu butongore. Agizire ngu nibaija kuronda emizindaaro. Kandi ahabw’endwara ya COVID-19, nibaija kutambura n’abantu bakye batambuze amakuru buri hamwe barikumanyisa abantu ngu Mbarara yaakura yaruga aha rurengo rwa Munisiparite, yaaba City.

Oku beteekateekire okwakiira “City”

Okurugirira ahari tauni kiraka wa Mbarara, Theophilus Tibihika, omu mwaka gwa 1991 Mbarara Munisiparite ekaba aine abantu abarikwingana 41,031, omwaka gwa 2002 bakaba bari 69,363. Omu rubaro rw’abantu oruhweire orwakozirwe 2014 n’abantu 195,500 abarikutuura omuri Mbarara Munisiparite ngu kandi obwa hati abantu 250,000 nibo abarikuteeberezibwa kuba nibo abarikutuura omu Munisiparite.

Tauni kiraaka ayorekire ngu okweyongyera kw’abantu ab’orubaju orumwe n’omugisha kandi orundi ni kibi ngu n’ahabw’ekyo tihariho omuntu n’omwe orikuza kugaruka kwikirizibwa okwombeka ataine purani erikuragira omu biragiro okwenda okwerinda omwijurano gw’etauni.

Ayorekire ngu omuntu yakwatwa arikwombeka atakurateire mateeka g’etauni, naija kukorwaho nk’oku ebiragiro birikuragiira.

Ekya buri muntu na bizinesi kwereebererera kasasiro

Tibihika naagira ngu abantu baingi ku barikwija omu tauni, ni barya, bakora, bagura ebintu  kandi ebi nibyo ebirikureka kasasiro omu tauni. Nayongyera agira ngu nka kanso baaherize kusharamu kugira ngu buri muntu na buri bizinensi aine kwerebererera kasasiro kandi n’okuronda abarikugibayoorera bakagitwara ahi erikunagwa kutari kutegyereza kanso.

Oraremwe okukora eki nainga yashangwa naanagaijura nainga arikwotsya kasasiro n’ow’okujunaanwa nk’oku amateeka garikuragiira.

Eby’emishuburo kutebwa omu buteeka

Tauni kiraaka agizire ngu eby’okushuubura ni gumwe aha mirimo ey’amaani erikukorerwa omu tauni ya Mbarara. Ngu kwonka n’obu abantu barikwenda kushuubura baitu baine kuba bari omubuteeka kutari kuteeka eby’emishuuburo yaabo ahanguuto omu mwanya ogu abantu barikutamburiraho

Agizire ngu tihakiriho muntu orikwikirizibwa okushuuburira aha rubaju rw’enguuto nainga omu maisho g’eduuka ya mutaahi we ngu ahabw’okuba na abingi abarikushuuburira aha mihanda tibarikushashura mushoro.

Amataara

Okurugirira ahari tauni kiraka Tibihika na Meeya Kakyebezi, “City” eshemerire kuba neyaka, etarimu mwirima. Okurwanisa ekyo, hariho purojekiti y’okubyara ebitaara ahanguuto ebirikukoresa amaani g’omushana (Solar street lights) eri omukugyenda omu maisho. Purojekiti egi etandikiire  Biharwe, Koranorya, Mayanja, Banyu Road, Kampala – Katete, Pekamega; Isingiro road, Ruti, Mbarara Regional Referral Hospital, Rwebikoona, Kiyanja,Ruharo n’emyanya endiijo.

Omubaro gw’ebitaara ebirikuza kubyarwa omu tauni okwetooroora etauni nibingana 704 kandi n’eby’okumaraho sente ezirikwingana obuhumbi 6, obukaikuru 575, emitwaro 85 na 100 (6,575,850,100) omuza Uganda kandi baaherize kushashuraho sente ezirikwingana akahumbi 1 na Miriyooni 972 (1.972Billion).

Kakyebezi ayorekire ngu purojekiti ekaabaire yaahweire baitu ekabanza kuteganisibwa endwara ya COVID-19 ngu kwonka ahi eraabe yahweraire, Mbarara neija kuba  n’eyaka  nka za “City”  zoona ezindi.

Za kamera

Capt. Tumusiime Bamuturaki, Mukuru w’entebe ya kataano ahabwa disiturikiti ya Mbarara agizire ngu Mbarara etwire neteganisibwa abahenzi b’ebiragiro okukira munonga abashuma. Ngu kandi baaherize kubyara za Kamera  ezirikureebwa n’ezitarikureebwa okwetooroora  etauni yoona okubayambaho okurwanisa obuhenzi bw’ebiragiro omuri Mbarara.

Ayorekire ngu omurimo gw’okureeberera za kamera ezi gukwatsiibwe pooriisi kandi ebi za kamera zirikureeba zibitwariraho aha pooriisi. Kandi eki bakikozire okwenda kutereeza eby’okwerinda bya buri muntu orikutuura omu tauni ya Mbarara n’emyanya egyehinguririize.

Kakembo Yusufu, orikukurira  ekitongore ky’eby’okwerinda ekya  Local Defense Unit (LDU) agizire ngu  abantu baingi  batwire nibazaanazaanira  omu  tauni ebaire ekiri nkye  ngu kwonka obu ekuzire ekaba “City”  eby’okuzaana bihweireho. Bakwatanise n’ebitongore by’okwerinda ebindi ebirimu pooriisi na UPDF, nibaza kuguma nibakora ebikwekweto okwetooroora etauni yoona.

Ngu kandi wakwatwa orikuhenda ebiragiro n’okutwarirwaho omu kooti kujunaanwa ebikorwa ebi. Ahi baraabe batahikire, za kamera niziza kuguma nizibahweraho.

Eby’okuyomberera abantu n’okushisha orwoya rw’okwitsya

Tauni kiraka agizire ngu baaheerize kumanyisa ab’ebyokwerinda  abarimu na Pooriisi ey’ebiiruka (Traffic Police) okukwata buri motoka yoona erikushohoza omwika mubi ogurikurofahaza n’okushisha  omwoya gw’abantu bari kwitsya.

Ayongyeire yaagira ngu omuntu weena orikwenda kutandikaho bizinensi ya y’ebidongo (Disco) ninga kutandikaho eiramizo aine kwombeka ebisiika ebitarikwikiriza ruyombo (Sound proof) kushohora kuyomberera  abandi bantu abari omu busingye bwabo. Ngu kandi oraremwe kukikora  naija kukwatwa.

Eby’okuhitsya aha bantu amaizi garikumara.

Amaizi maingi agarikwejunisibwa omu tauni ya Mbarara n’emyanya egyehenguririize n’aga National Water and Sewerage Corporation kandi agu barikwiha omu mugyera gwa Rwizi.

Meeya Kakyebezi agizire ngu okumara emyaka mingi, Munisiparite ya Mbarara etwire nebaisibwaho omugyerwa gwa Rwizi  baitu  nagwo  ogutweire niguteeganisibwa ekyanda  aha bw’emirimo erikukorerwa omu rubanju rw’omugyera ogu.

Okurugiirira ahari Emmanuel Ekanya, orikwebembera ekitongore ky’amaizi ekya National Water and Sewage Corporation (NWSC) omukicweka kya Ankore, Munisiparite ya Mbarara n’emyanya egyehinguririize n’eyetaaga  amaizi agarikwingana lita miriyooni 20 buriizooba  kandi omugyera gwa Rwizi nigushohoza amaizi “13 Million litres” zonka.

Kandi okwenda kumariraho kimwe eibura rya amaizi omuri Mbarara City n’emyanya egyehingurize, Gavumenti ya Uganda eheerize kutunga sente ezirikwingana 7.9 biriyooni omu sente eza Uganda kuruga omu Government ya Bufaransa okwiha amaizi omugyera gwa Kagera kuraba Isingiro mpaka Mbarara.

Omuby’amagara

Okurugiirira ahari tauni kiraka Tibihika, Munisiparite ya Mbarara eine amarwariro 12 aga gavumenti n’eirwariro eriri aha rurengo rw’eihanga orwa ‘National Referral Hospital’ okwetooroora za diviijoni 6. Gamwe aha marwariro aga ni; Mbarara Municipal Health IV, Kakoba Health Centre III, Nyamitanga Health Centre III, Ruti Health Centre II, Nyamityobora Health Centre II, Kamukuzi Health Centre II, Nyakayojo Health Centre III, Kicwamba Health Centre II, Rwakishakizi Health Centre II, Biharwe Health Centre III, Rwemigina Health Centre II na Kyarwabuganda Health Centre II.

Agizire ngu bariyo nibagyezaho okuhindura eirwariro rya Kyarwabuganda Health Centre II okuza aharurengo rwa “Health Centre III”. Oihireho ekyo, bariyo nibagyezaho okuhaajaana  na  Dr. Nathan Karema mukama w’irwariro rya Mbarara Community Hospital okureeba ngu baarigura. Ngu kandi eki nikyija kuyambaho eirwariro rya Mbarara Referral Hospital omu kutuubya omwijurirano.

Eby’omushoro

Kajubi Benon, omuhandiiki mukuuru w’eby’esente, naagira ngu Munisiparite ebaire n’erundaana omushoro kuruga omu mishuuburo okwetooroora diviijoni 6.

Kandi we Tauni Kiraaka naagira ngu okutandiika n’omwaka gw’eby’esente 2020/2021, nibaija kuhangaho ekitongore ekyetongoire ekiraabe nikijunaanizibwa ahaby’emishoro n’entaasya ya “City”.

Naagira ngu baaheerize kuhandiikira ekitongore ky’abakozi ekya Public Service okubaikiriza kandi ngu yaaherize kubikiriza. Ngu nibaza kugura n’ekyoma ekirabahwereho okureebuuza nk’oku omushoro gurikushoroozibwamu, kumanya oshashwire n’otakashashwire; noha n’enshonga ahabw’enki ngu kandi eki nikaija kubahwera munonga omu kutunguura eby’entaasya.

Eby’enguuto

Meeya agizire ngu   baine oruguuto rwa Northern Bypass orukwingana oburingwa bwa kiromita 14, nizo mailo 8 n’obucweka 7 kandi ekigyenderwa ky’oruguuto oru kikaba kiri eky’okutuubya omwijurirano gw’eby’entambura okukira munonga ebimotoka ebihango ahagati omu tauni.

Oruguuto oru nirutandiikira ah’ikorero rya Coca-Cola eriri aharwa Mbarara – Masaka ruraba  omuri Rwebishuri omuri Kakiika, Nkokonjeru omuri Kamukuzi  rukwata omu rwa Mbarara-Kabale Road ahari Katatumba Resort.

Kakyebezi ayorekire ngu kiromita 21 ziherize kukorwa ahansi ya purojekiti ya Urban Support for Municipal Infrastructure Development (USMID) ezirimu enguuto nka Buremba, Bishop Wills, Bucunku, Akakiiki-Nyabongo, McAllister, Makhan Singh, Constantino-Robo na Mbaguta. Ezindi eziri omukukorwa nizingana  na kiromita 20 ezaraganisibwa  Purezidenti Yoweri Kaguta Museveni  kandi na sente eziri omukukora enguuto ezi niziruga omu gavumenti ya Uganda.

Oihireho ezo, Kakyebezi agizire ngu  baaherize kukora enguuto ezindi ezirimu; Katamba-Rwagaju-Rwemikunyu (kiromita 12)  aha sente ezirikwingana miriyooni 135.47, Rwagaju-Kikade (kiromita 4) aha sente ezirikwingana miroyooni 52, Ruceece-Misyamo (kiromita 3) aha sente ezirikwingana miriyooni 52, Karugangama (kiromita 6) aha sente ezirikwingana  miriyooni 13, Rwariire-Ngara road (kiromita 6) aha sente ezirikwingana miriyooni 11 n’ezindi.

LEAVE A REPLY