Tihariho kiivuru omwaka ogu – Best Emily

1661
0
SHARE
Best Emily ari owe, Kakoba Mbarara, omu Karantiini ya Coronavirus

Naamanyirwa munonga ah’iziina erya Best Emily. Niwe eiraka omuri Burengyerwa-izooba eririkukira kuhurirwa omubyeshongoro by’ediini nka “Diiguri Y’omuzaire”, “Oryahangaara”, “Embeera Y’ensi” n’ebindi bingi .

Omwishiki w’omurokore ogu, Emily Ainobushoborozi, n’enzaarwa ya Katooma, Nyabihoko omu disiturikiti ya Ntungamo kandi n’omwana wa kabiri omuka yaabo ey’abaana 4.

Emily akatandika kweshongora obu yaabaire ari omu siniya ya 5 kandi akashohoza ekyeshongoro kye ky’okubanza, “Fly To Heaven”, bwanyima y’okusinga empaka z’okweshongora ezaabaire zishagikirwe Fr, Vincent omuri Ntungamo High School. Vidiyo ye y’okubanza ekashohora omugwa 2012 obu yaabaire ari omu siniya ya 6. Yaahisya entambi 4 eziriho ebyeshongoro 24 oteiremu n’ebi ainemu abeeshongozi abandi.

N’omukugu wa za kanyabwengye otendekirwe kandi aine diiguri ya ‘Information and Technology’. Nayeshongora agaruka akorera emirimo ye omuri Mbarara, ahi amakuru g’okukingaho eihanga n’okwemereza emirimo ahabwa Coronavirus gaamushangire. Agaaniireho na Cynthia Kamusiime na Andrew Tushabe nk’oku embeera ya COVID19 erikumutwariza n’oku arikugirabamu.

“Mbwenu amakuru aga gakareetera naaguubwa kubi ahabw’okuba nkaba ndiyo ninyetebeekanisiza ekiivuru kyangye ekyabaire kiri eky’okubaho aha Sunday ya Paasika, obwo nkaba naateiremu sente nyingi,” nikwo arikugira.
Nk’abandi bantu baingi omu ihanga, Emily nawe akaba ateetebeekanisiize embeera egi akagyezaho omukaire ako yasherura ebyokurya, yaabita omuka kandi naagira ngu nibyo bikiriyo nibimubaisaho kuhisya obwire obu.

Haahwa ameezi endwara egi etaahire omu ihanga beitu Emily naagira ngu tihaine kihango ekiri aho ekyahindukire omumagara gye. “Mbwenu n’okugira ngu nyeyongyeire kuhamira munonga aharukiri, ndikukwesiga Ruhanga bwanyima y’amahanga goona n’abantu b’amaani kuremwa,” Emily naagira ngu omumbeera nk’egi, amatsiko nituganshanga omuri Ruhanga wenka ahabw’okuba obwa hati niwe aine obujunaanizibwa bwona ahamagara gaitu.

“Omu karantiini egi nkabanza nahuumuraho ekirikumara kwenda ngu mbanze nyeyiheho oburuhe obunaabaire naahisya ahabw’amaani agu naabeire nteire omukwetebeekanisiza ekivuru,” Emily hoona nabwo naagira ngu omu wiiki emwe akaba yaaruhuukire kandi aho niho yatandikiire kwongyera ahakushaba n’okuhimbisa Ruhanga, kuhandiika ebyeshongoro, okutungayo obwire bw’okuza omu situdiyo hamwe n’okuteeka  ebyokurya ebi arikukira kukunda.


“Okukira munonga, nkeyongyera kukura omubikwatiraine n’okuramya n’okuhimbisa reeru ahasigara niimara obwire bwingi n’abahagizi bangye abarungi ahamikutu ya intaneeti,” nikwo arikugira.

Beitu naagira ngu empinduka egi neteekwa kuba eriyo neegumira bamwe omubeeshongozi bataahi be kandi ngu n’obusente omu babaire nibabiikaho nibubaasa kuba bwahwaireho obwa hati ahabw’okuba babaire nibataahiza omumirimo y’okweshongora.

Ebiro ebi arikuba ataineho mirimo y’amaani erikumwetaagisa, Emily takiimuka mukasheshe munonga nk’okuyaabaire akora Coronavirus etakaizire.
“Ku ndikubyama obwire bwagyenzire, omukasheshe tindikwimuka mukasheshe. Ninyimuka bwaba nibuba nk’omu ihangwe aho. Ntyo nshaba reeru ntebeekanisa akatogo kangye. Aho nkiheza nza ahamikutu yangye aha intaneeti, obwo nimba ningarukamu obutumwa bw’abahagizi bangye ndikubaha ebyeshongoro n’endagiiriro zabyo aha YouTube n’ahandi.

Ku ndikuheza kurya, nintungaho akaire kangye ak’obucureera n’okwehereera, ngaruka nshaba, nkirugayo ntandika kureeba za firimu. Ku ndikuba nduhire ninshoma akatabo kuhisya nka shaaha 6 nari 7 z’ekiro; mpaka ahi ndikutwarirwa oturo. Na bwataho nikw’okwo!”

Beitu ebiro ebimwe Emily naimuka shaaha nka 4 z’akasheshe aza ahasitudiyo, nka hati obu ariyo naakora abyeshongoro ebisya, na bwanyimaho ateera-teeraho amasimu aho kutebeekanisa ahaby’okukwata vidiyo zaabyo.

Nk’omweshongozi w’ediini kandi orikumanywa baingi, naagira ngu acweiremu kuhika abo abu arikumanya ngu nibetaaga obuhwezi. “Ninyohereza ebyokurya, akasente hamwe n’obutumwa bw’okubahuumuriza beitu tindikukunda kworeka ku haine eki ndikuha. Beitu haine abu mpwereire kandi abarikwetaaga obuhwezi buzima,” nikwo Best Emily arikugira

Nayongyera agira nk’omuntu, embeera ya Coronavirus emwegyeise nk’oku embeera y’ensi etanguhi. “Nyegire ku hariho ow’ahaiguru oine amagara gaitu omungaro, twikirize ninga twangye! Nabaasa kukingaho amagara gaitu omudakiika oshangye hataine n’ori omunsi egi.

Hariho ebintu ebi bamwe babaire nibateekateeka ngu tibarikubaasa kubaho bataine haza eki Emily abandize kureeba n’amaarwa. “Haine ababaire nibateekateeka ngu tibarikubaasa kubaho batanywire. Kandi hariho n’abo ababaire nibagira ngu nibabaasa kubaho, ahi Ruhanga atari. Hati haihi buri omwe ari ahamaju nayeshengyereza Mukama kandi eki kibaasa kugumizamu mpaka,” Emily nikwo arikugira.

Byanyima ya Coronavirus kumureetera okushazamu ekiivuru kye, Emily ayongyeire yaakisharizamu kimwe omwaka ogu.

“Egi endwara ku eraabe yagyenzire, embeera yaagarukire nk’owa buriijo, ekindabanze kukora n’okwetwara ‘out’. Reeru na bwanyima ngarukye ahamurimo. Tihariho kiivuru kyona omwaka ogu. Kwonka ndiyo ninteekateeka ahamwaka ogurikwija. Ruhanga yaaba akiikiriize, omwanya n’izooba ebi naabaire nteireho nibiija kuguma biri ebyo,” nikwo arikutekateeka.

Ahabahagizi be Emily naagira ngu, “Ninyenda kumanyisa abahagizi bangye ngu nimbakunda, batambwire nanye orugyendo barikugumizamu kunkunda kandi nibo maani gangye. Nimbashaba kuguma bahamire, eki ku kiraahwe nitwija kugaruka tushemererwe kumwe kandi nimbashaba kuguma beerinzire,”

LEAVE A REPLY