Eza Italia Serie A kugarukamu omukwakataano

1117
0
SHARE

Estar Lisa Ahurira

Italy eteireho ebiro 18.05.2020 nk’ekiro eki abazaani baragarukyemu okutendekwa kwabo okweteekateekyera okugarukamu kw’emizaano, y’empaka ez’omupiira gw’ebigyere eza Serie A.

Enganzi ya Italy Giuseppe Conte naagira ngu za tiimu zigarukyemu okweteekateekyera emizaano.

Serie A ekongyezibwayo kwiha ebiro 09.03.2020 obu government erangirira okukingwa n’okwemereza buri kimwe (lockdown) omu ihanga rya Italy ahabwa Coronavirus.

Eihanga rya Italy obwa hati rigyerizeho kukingira abantu okukwatwa akakooko ka Coronavirus bwanyima y’okuba niyo yaabonabona munonga n’endwara egi omuri Buraaya kandi Serie A niyo liigi ey’amaani eyabandize kwongyezayo emizaano y’omupiira.

Tureebire abazaani b’amaani omu liigi egi nka Paulo Dybala, Daniele Rugani na Blaise Matuidi barikukyeberwa kandi bakashangwa baine akakooko ka coronavirus obwo eihanga ririkukinga kandi rikeemereza n’emirimo yoona.

Emizaano 12 niyo esigaireyo omu mpaka za Serie A, oteireho n’emizaano 4 eyayongyezibweyo kuruga omu rawunda ya 25. Ez’ekikopo kya Italy (Italian Cup) zikongyezibwayo bwanyima ya ‘semi-finals’.

Eki nikimanyisa ngu Serie A ebaasa kugarukwamu kuzaanwa omukwamukaaga beitu Conte naagira ngu okucwamu obu emizaano eraagarukyemu nikwija kukorwa bwanyima.

Conte nayongyera agira ngu n’abairuki naabo nibaikirizibwa okugarukamu kutendekwa kuruga ebiro 4.05.2020. Eryo niryo eizooba obu emyanya erikuzamu abantu eraigurwe nka za paaka, emyanya y’okuhuumuriramu n’ahandi haingi kandi n’abantu nibaija kwikirizibwa kutambura.

Beitu, Conte agambeire eihanga ngu abantu baine kugumizamu n’ okweheereza emyanya n’okureeba ngu tibahikaana munonga okuzibira okujanjaara kw’akakooko ka corona virus.

LEAVE A REPLY