Corona Virus (Covid-19) yaahika Kenya: Ebi oshemereire kukora okwerinda endwara egi

1750
0
SHARE

Tushabe Andrew

Ekitongore ky’eby’amagara omu ihanga erya Kenya eririkwatana na Uganda omuri burugwa-izooba kyarangirira ku kiine omukazi omwe obaire naruga Amerika kuraba London omuri Bungyereza. Obwa hati omukazi ogu yashangwa aine akakooko ka Corona Virus akateire amagara g’abantu aharutezyo omunsi yoona kuruga omwaka ogu gutandika.

Obwahati gavumenti ya Kenya yayihayo emikoro, enteerane n’ebiivulu byona ebirikuba birimu abantu baingi. Abarikutwara abantu omumamotoka baaragiirwa kutaho emibazi ei abashabaazi baraabe nibanaaba baaba nibaza kushabaara.

Eki nikimanyisa ngu endwara egi n’ebaasa kuba ekuri aharubaju obwa hati n’obu haraabe hatakabaireho okurangirira omubutongore kuruga omukitongore ky’ebyamagara ekya Uganda

Endwara ya Corona Virus ei bacweire bugufu bakeeta COVID-19 ekarangirirwa eihanga rya China ahamuheru gw’okwezi kw’okubanza omwaka ogu. Endwara egi obwa hati ejanjaire omunsi yoona kandi eri omumahanga 46. Amahanga agandi nago gari omukabi k’okutaahirirwa endwara egi.

Omuri Italy, omubaro gw’abantu abarikufa ahabw’endwara egi gutumbiikire gwaruga ahabantu 189 gwahika ahari 1,016 omushaaha 24 zonka ekirikumanyisa ngu okwo n’okweyongyera okw’obucweka 23 ahari 100

Omukizinga ekya Afrika, amahanga aga Algeria, Misri, Nigeria na Kenya eriizooba nibahamya ku baine abantu abaine oburwaire bwa Corona Virus. Emigisha y’endwara egi, kujanjaara omumahanga ga Afrika agandi na Uganda ogiteiremu, eri ahaiguru. N’obu eraabe etaine abantu abaamanyirwe kuba baine endwara egi, Uganda eine okukwatwaho kuhango kuguma ahabuzoora-maisho kandi eteho emiringo etari emwe n’emwe ey’okwerinda kwerinda okukwatwa endwara egi.

Obwa hati ekitongore ky’eby’amagara omu Uganda hamwe n’eky’eby’amagara omunsi yoona ekya World Health Organization biteireho ebintu ebishemereire kukorwa n’ebitashemereire kukorwa nk’engyenderwaho kwegyesa abantu ahakwetantara endwara egi.

Endwara ya Corona Virus (COVID-19) n’eha?

Ni endwara erikukwata abantu omubwira oburikweraririkiriza kandi nereetwa akakooko akaizire busya akarikwetwa Corona Virus (COVID-19). Nejanjaara kuruga ahamuntu kuza ahandiijo erikurabira omukwesyamura nainga okukorora (amatondo nigaba garimu akakooko aka) omubiri okukwatagana n’emibiri ey’abantu abandi abagiine hamwe n’okukwatagana n’ebintu ebi akakooko aka karikuba kariho.

Obumanyiso bwa Corona Virus

  • Omushwija
  • Okukorora
  • Ebironda ahaaraka
  • Oburemeezi omukwisya
  • Obubonero obundi oburikushushana n’obwa sanyiga nk’okureeta ebihinzi, okwesyamura n’okuhwa amaani.

Ekishemereire kukorwa kwerinda.

  • Naaba engaro zaawe na sabuuni n’amaizi obutoosha. Eki nikiza kwihaho akakooko ku karaabe kari omungaro zaawe
  • Shangira/shweka ahamunwa gwawe n’akatambaara waaba nokorora nainga noyesyamura. Akatambaara kanagye hare aho n’aho bwanyima y’okukakoresa reeru onaabe omungaro n’amaizi na sabuuni.
  • Yeshumbe omuntu weena oraabe nakorora nainga nayesyamura. Reebeka ngu t’ori nawe omumwanya gurikutandikira ahaburaingwa bwa mita 1.
  • Yetantare okukwata omumaisho, enyindo hamwe n’omukanwa. Engari nizikwata ebintu bingi kandi ebirikubaasa kuba biine endwara egi ekirikubaasa kwiha endwara egi ahabintu ebi engaro zakwata zikagikurwaza.
  • Ku oraabe oine noyehuriramu okupiipa/omushwaija, orukororo hamwe n’oburemeezi omukwisya, sherura obuheereza bw’abashaho aho n’aho. Kyaba nikibaasika, teerera esimu abashaho obagambire ahambeera yaawe. Kuratira obuhabuzi bwona obw’omushaho arikukuheereza.
  • Abantu abaine obumanyiso oburikushushana n’obwa sanyiga bashemereire kwejunisa oburikushangira ahamaisho, nari shi face masks, kushangira enyindo n’eminwa kandi bagume omuka omunju eyombekyeiremu ebihengyere birikurabamu ebiho.
  •  Ku oraabe nojanjaba abaine obubonero bwa Corona Virus nk’okukorora n’orushwija-shwija, nohaburwa kukoresa kweshangira enyindo n’eminwa kwerinda okukwata oburwaire.
  • Yonja kandi ofuuhirire n’omubazi emyanya ei abantu barikukira kukwataho nari kutaho engaro zaabo nk’eminyororo y’amaigi n’amadirisa, amaigi ga za motoka, amapeesha ga za lifuti (elevator) n’ahandi buriijo orikukoresa sabuuni n’amaizi.
  • Abantu boona abarikuba nibaruga omumahanga g’aheeru agarimu akakooko ka Corona Virus bashemereire kukuratira ebiragiro n’obuhabuzi ebirikubaheebwa abakugu omuby’amagara ahabishaayi by’enyonyi n’ahandi ahamyatano y’eihanga.

Ebitashemereire kukorwa

  • Yetantare okukwatana omungaro n’okufumbata abantu obwire bwona
  • Yetantare abantu abarikureebeka nk’abarwaire omushwija ninga sanyiga kandi baine n’obubonero bwabyo.
  • Ku orarware nainga watunga obubonero bw’omushwija na sanyiga, yetantare okuza omumyanya erimu abantu, omuma ofiisi, enkiiko n’ahandi. Guma omuka kwerinda okuturira abandi.
  • T’orikwetaaga kushweka/kushangira ahamaisho waaba otaine bumanyiso bw’omushwija na sanyiga nk’okukorora, okwesyamura nainga okureeta ebihinzi.
  • Otakaayeragurira nainga okeeha emibazi
  • Otacwera omubantu. Sherura emyanya eyetongoire nka kamina obe nimwo wacwera.
  • Ba orinzireho kuza omumahanga agarimu endwara egi. Ku oraabe otarikubaasa kurindaho, nyabura kuratira obuhabuzi obu hamwe n’obu abakugu omuby’amagara baraakuhe.
  • Yetantare engyendo naingwa ku oraabe oine obumanyiso nk’obwa sanyiga

    Abantu boona nibahaburwa kuhayo omuntu weena orayorekye obumanyiso bwa sanyiga ahamarwariro agabari haihi nainga bateere ekitongore ky’eby’amagara ahasimu ezi 0800-203-033 nainga 0800-100-066

    Hariyo amatsiko

    Omuri South Korea ahi endwara egi yabaandize kubaruka omubwingi oyihireho China, abarwaire nibaguma nibakira mpora-mpora kandi omubaro gw’abarikukira ni mwingi munonga kukira ahagw’abo abarikukwatwa busya. Eki kyamanywa eriizooba orwakataano ebiro 13 obu baatunga omubaro mukye munonga gw’abakwatsirwe omu wiiki 3 ezihingwire.

LEAVE A REPLY