Okurwanisa akakooko ka siriimu: Omuringo gw’okurinda omwana omunda nigwo gwebembeire omukukingira akakooko

238
0
SHARE

Stuart Twinomujuni

Obwo ensi yoona erikwijuka ekiro ky’akakooko ka siriimu, twaranzya aha miringo ei gavumenti ya Uganda yaateireho kubaasa kukyendeeza aha kujanjaara kw’akakooko.

Abahangu nibooreka ngu enkora y’okukingira akakooko ka siriimu kuruga aha muzaire kuza aha mwana nigwo muringo ogusingireyo kwejunisibwa omu kukyendeeza akakooko aka.

Endwaara yakakooko ka siriimu omu Uganda ekabanza kwetegyerezibwa omumwaaka gwa 1982 omudisturikiti ya Rakai kwonka obwaire obwo abantu bakaba bagiteeranisa noburogo  baitu ahabwokucondooza kikeija kyamanywa ngu ni siriimu ahabwokuhururuka okahwa ahamagufa.

Ahabwokweyongyera kucondooza gavumenti ekatandikaho ekitongore kya TASO kugira ngu kireberere abarwaire abarikutuura nakakooko kandi ekitongore eki kikatandikira ahakuterera abantu omuranga gwokukyebeza  kikahereza abarwaire ebijuma byokukyendeeza amaani gakakooko kwenda ngu abantu bagume namagara marungi.

Kuruga enyima  omuntu weena owabaire akwaatwa akakooko ka siriimu akaba amanya ngu nowokufa kwonka ahabwokweija kwemibazi ya ARVS, abantu babaasize kuguma namagara marungi.

Hatwiireho endaijo miriingo yokukiingira siriimu eyi gavumenti etwaire nagambirira erimu okweriinda, okuba omwesigwa aharyaabo abakundaine nainga okwejunisa akapiira.

Kwonka eki kukyabuzire kumara gavumenti yataho ogundi muriingo ogwokukiingira okukwaatwa kwakakooko kuruga ahamuzaire kuza ahamwana.

Baingi omubaine akakooko  nibamira omubazi emirundi 3 omweizooba  kwonka ahabwabantu kweganya orubiimbi oru, gavumenti hati etongwiizeho ekijuma kitsya ekimanyirwe nka Dolutegravir omurwaire ekyarikumira omurundi gumwe omweizooba kandi hariho amatsiko ngu kibaasa kwiihamu abarwaire obwooba bwokumira emibazi.

Uganda  ebaire eihanga rya 3 omu Africa  ezibandize kuganyirwa omukwejunisa omubazi ogu bwanyima ya Kenya hamwe na Nigeria.

Orutaro rwokurwanisa akakooko obwahati  rwiizire namaani miingi wakuratira  entekateeka eriho negyenda omumaisho eya 90-90-90 erikwenda kureeba obucweeka 90%barikwejumbira omukucebeza, obundi 90% bwashangirwe nakakooko burikumira emibazi kandi 90% obwabari ahamibazi barikukanyisa abaserukare bomubiri.

Okurugirira ahakitongore ekya UNAIDS,Uganda obwahati yabaasize ekyokureeba ngu abantu obucweka 76% bakyebiize kumanya amagara gaabo okugemeriire,obucweeka 73% bariyo nibamira emibazi kandi obucweeka 69% amaani gakakooko ka siriimu omushagama gari ahansi munonga.

LEAVE A REPLY