Abarikushomba omushenyi beesharingire ahabw’emishoro

105
0
SHARE

Stuart Twinomujuni, Sheema

Poriisi omu disiturikiti ya Sheema egyemesereziibwe kuteera amasasi g’entuumuuki kutaataanisa abatimbi b’omushenyi hamwe n’abavugi b’ebiroore ababaire nibesharingira aha kanso ya Sheema ahabw’emishoro eri aha mushenyi.|

Emishoro egi ebaire neshaba buri tipa y’omushenyi kushashura 5,000 buri murundi ogu erikushomba baitu abavugi eki bahakaniise bagumize ngu n’okubanyuunyuta.

Omu tauni ya Butagasi omuri Ngoma Sheema niyo abavugi aba batandikiire akeshariingo kaabo bwanyima y’aba kanso  kukinga emihanda ngu motoka eraaze kurabaho ebanze yashashura sente ezi.

Abantu aba, ababaire bahagatiire ebiti n’ebitiiho, babaire bariyo nibaza kwirukanzya ababaire nibashorooza baitu Poriisi ebabugaine omumuhanda bari nk’enjoki z’ekyanda nikwo kubeemereza.

Ahabw’empaka nyingi tibenzire kugyendera ahamateeka ga Poriisi nikwo kutandika kugirekyera amabaare ekigigyemeseriize kubatamu amasasi bakahungira omubishaka.

Kwonka bwanyima abeebembezi b’abavugi aba bareebirweho barikugambira Poriisi ahabirikubashaasha.

Nibagira ngu omushenyi ti bizinensi ei kanso eyine kutega amaisho kwonka babaire nibekwatsa omwe omanyirwe nka Steven Katanywa kuba niwe arikubitamu amaani

Ahiturugiire omumwaanya ogu tusigire bahendagura n’obwaapa bw’emishoro egi kandi bureebirwe burikuzeereera ahamutwe gw’amaizi.

LEAVE A REPLY