Beebembeize abashaija ahaby’okubariirira oruzaaro

459
0
SHARE

Christopher Ahimbisibwe, Mbarara

Ku orikubuuza n’oha mukama w’eka ninga orikwebembera eka, abashaija aho niho orikubareebera ngu nibabaasa. Kwonka ku kirikuhika ahaky’okubariirira oruzaaro, aho abashaija nibeegama aha rubaju, enshonga bazirekyera abakazi.

Okurugiirira ahari Edson Mugume Hillary, orikwebembera ehururu erikuhiga abashaija kushara, arikukorera ekitongore ky’eby’amagara ekya Reproductive Health Uganda, ekintu eki n’ekitahikire n’akakye kushanga ngu omushaija narekyera omukazi enshonga ezikwatiraine n’embariirira ya ruzaaro.

Ahamukoro gw’okutongoza ehururu y’okwongyera abashaija obujunaanizibwa ahambariirira ya ruzaaro omukwakabiri omuri Kampala, Minisita w’eby’amagara, Dr. Jane Ruth Aceng akooreka ngu okucondooza okwakozirwe omugwa 2014 nikworeka ku obucweka 34 ahari 100 bw’abashaija abashweire, hamwe n’obucweka 41 ahari 100 bw’abakazi abashweirwe nibaba nibakora ekirikubaasika kureeba ngu baarekyer’aho okuzaara.

Nk’omuringo gumwe ogu abakyara barikubaasa kwerinda kutwara enda, kishangirwe ngu obucweka 62% bw’abakyara nibakoresa emiringo y’okumira obujuma oburikukingira okuzaara obu baingi barikumanya nka “pills”.

Obucweka 26 n’akaragarikira 1 ahari 100 bo nibarikukoresa emiringo ey’aho n’aho nk’okukoresa akapiira (condom) hamwe n’obujuma obw’aho n’aho, kandi obucweka 3 n’oburagarikira 9 ahari 100 bw’abakazi nibakoresa emiringo ey’embariirira y’oruzaaro erikutwara obwire buraingwa nk’okuteeza ekikatu, akaheta ka nyinenda hamwe n’endiijo.

Kwonka ekirikutangaaza n’okushanga ngu, omumbariirira y’oruzaaro, abashaija tibarikuhisya n’akacweka 1ahari 100 abarikugyezaho kureeba ngu baashara enshekye zaabo nk’omuringo gumwe gw’okubariirira oruzaaro. Obwahati ekitongore ky’eby’amagara kikwataniise n’ebitongore nka Reproductive Health Uganda, hamwe na Reach A Hand Uganda bashaziremu kushomesa hamwe n’okwegyesa abashaija nk’oku baakubasa kubariirira oruzaaro obwe barikushara obushekye bw’abashaija.

Omuranga ogu gukatongozibwa ebiro 26/02/2019 omuri Kampala n’omutwe gurikugira ngu “Abaishaija Kwebembera Ehururu Y’okubariirira Oruzaaro “Men At The Forefront Of Family Planning”.

Kurugiirira ahari Amon Mulyowa, owa Reach A Hand Uganda,  ehururu egi eriho kushomesa hamwe n’okushara enshekye z’abashaija abo abatarikwenda kugaruka kuzaara.

Obwa hati ehururu egi ekatandikira omu disiturikiti nka Kampala, Hoima, Mityana, Mbarara, Soroti, Kumi, Arua hamwe na Mbale. Neija kugumizamu omu disiturikiti zoona ez’ihanga kandi n’ey’okumara omwaka ogu

Mulyowa nayongyera agira ngu abashaija boona abarikwikiriza kuza ahambariirira y’oruzaaro, Minisiture y’eby’amagara, kurabira omu kitongore ekya Reproductive Health Uganda, bariho kuheereza abashaija obuheereza obwa busha baaba nibabashara.

Mugume, kandi ori omushugaanisa omukitongore ekya Reproductive Health Uganda, arikugambaho  n’abantu b’ekyaro kya Nyakibungo omuri Rubaya Kashari aharwakatano ebiro 29/03/2019, agizire ngu okushara obushekye bw’omushaija n’omuringo gumwe ogu omushaija yaakubaasa kuhwera omukazi we obutagaruka kuteganisibwa n’embariirira y’oruzaaro.

LEAVE A REPLY