Abataka barikurenga 350 n’ab’okubingwa ah’eitaka omuri Lyantonde

132
0
SHARE

Sande K. William

Habarukireho okwerarikirira omu bataka 350 ba Trading Center ya Bihorobo-Lyantonde Rural bwanyima y’omugaiga Deziderio Ndaza kwenda kubabinga omwu itaka eri arikugira ngu n’erye.

Abataka aha bahikire n’ahakwesharinga barikugira ngu eitaka eri niryo batwire nibatahamu amaizi kandi ririmu n’eishomero rya Bihorobo PS.

Eitaka eri niringana hiika 49 kandi ririmu n’eishomero rya Bihorobo PS, hamwe n’enshuro z’amaizi kuruga omu rushozi agarikuhwera abantu b’omuruka gwona ,

Joshua Kamukama, omutaka w’ekicweka ekyo naagira ngu eiziba eriri omu itaka eri nimwo barikutaha amaizi boona.

“Bakariguza! Baatubeiha ngu nibaija kwombekaho ekiteehurizi. Naitwe nk’abataka nikwo kugira ngu nitubaasa n’okushonda omuganda gw’okwombeka n’eishomero. Kwonka ahamuhero baahendera bagurize abantu za poroti,” Jane Busingye, omutaka nawe nikwo arikwetomboitwa atyo.

Okurugiirira aha byafaayo by’eitaka eri, nikigambwa ngu ryona rikashangwa riri erya Kabaka wa Buganda, kandi ngu abagaragwa be na kampuni ya Buganda Land Board, nibo barikwikirizibwa kuguza ninga kuriha abo abarikuha sente sente z’obushuuru buri mwaka.

Aba nigira ngu bakafurura kandi abataka bo bari omuntaro z’eitaka. Hati naanye enshonga ezo niziba zankiza amaani. Kandi abaami ba Kabaka ku barikuba nibaguza obwire obwingi tibarikunyeta nyowe nk’omwebembezi w’omwanya, kureeba oku birikugyenda. Kandi ninteekateeka ngu n’omukihandiiko ekyo, tiwaahuriramu maziina gangye kandi n’omukono gwangye tiguriho. Egyo enshobi nayo eri aha” Beatrice Mbabazi, orikwebembera akakiiko k’okubanza omumwanya nikwo arikugambira TV West.

Abeebembezi kuruga omuri Buganda Land board  bashabire omugaiga kugirira embabazi abataka aba ngu haakiri abagabireho nka fuuti 30 nikwo kwikiriza  kwonka bo abataka bagumire bangire .

Rev. Nathan Kasozi owa Buganda Land Board nashaba abataka ku bashaba omugaiga ogu kubahaho ekicweka ky’eitaka ahabw’okuba tari w’okurugaho kandi n’abataka baremeire omu itaka eri

We Deziderio Ndaaza, omugaiga orikujunaanwa nagira ngu “Nyowe nk’omuntu mbaire ncweiremu kukoma aharwizi na fuuti 15 kwonka omwami wa Kabaka ku yaija n’abataka baataho fuuti 30 kandi naikirizagana n’okugyenda n’ekyo ahabw’okuba orwizi naanye nindwetenga munonga.”

Joseph Bukenya ,omutaka nagamba ahanshonga egi agumize ngu, “Obusuuru nibabugyerekyera shiringi 5,000 buri mwaka. Kwonka obusuuru nabwo bangire okubuha. Kandi obwo noshanga omuntu ari ah’itaka ataine kihandiiko na kimwe ekirikumugambaho nari ekirikurigambaho.”

Na bwanyima y’okurambura eitaka eri beetsirwe omu rukiiko aha mbuga y’eishomero kwonka baingi tibarugiiremu

LEAVE A REPLY