Kofi Annan kumara ebiro 3 arikucurirwa

1089
0
SHARE

Omubiri gw’omugyenzi, Kofi Annan, gwahika omuri Ghana eriizooba, kutandika orufu orurikuza kumara ebiro 3.

Akakiiko k’eby’okuziika bwanyima y’okwebuuza ahab’eka ya Annan yaashohoza oku eby’okuziika biraatambure omururembo Accra

Kofi Annan owaabaireho omwebembezi w’ekibiina ky’amahanga ageeteeraine owa 7 afeereire omuri Switzerland wiiki ezihwaire bwanyima y’okukwatwaho oburwaire  kumara akaire kakye

Omubiri gwa Kofi Annan ashendekyereziibwe omukyara we na Nane Maria Annan, abaana be hamwe na bamwe omubakungu kuruga omukitongore ky’amahanga ageeteeraine.

Nyencakare, omubiri gwa Kofi Annan nigwija kworekwa ahari Accra International Conference Centre, ebiro 12.09.2018, abakungu nibaija kumuteera eriisho ery’ahamuheru kandi ebiro 13.09.2018 naija kuhuumuzibwa barikumukorera emikoro y’ekinyamahe

 

Kofi Annan n’oha?

Annan, enzaarwa ya Ghana niwe yaabaire omwiraguju w’okubanza kuruga ahakizinga kya Afrika kwebembera ekibiina eki. Na bwanyima akaija yaaba entumwa ahabw’ekibiina eki omuri Syria obwo arikwebembera okwinegyeza ehururu y’okureetaho obusingye omuringo ogucuriire omuri Buharabu omukyanga ekyo.

Akaija yasingura ekirabo ky’ensi yoona ahabw’okwehayo kureetaho obusingye nari shi “Nobel Peace Prize”

Okurugiirira ahakibiina kye ekya Kofi Annan Foundation, “Annan abaire ari omwebembezi ow’orurengo orw’ensi yoona kandi omuntu owaarwanire amagara gye goona kutaho ensi erimu obusingye n’oburingaaniza.”

Ekibiina eki nikyongyera kigira ngu ku haabaire ahabaho okuonabona nari ekyetaago kyona, akaba arugayo agira nk’oku yaakwatiraho abarikukwatwaho kandi ayoreka n’okukwatwaho kwe ahari abo abarikubonabona. “Akaba ayehayo ayebembeza abo abari omukyetaago ky’amaani ataketeekateekireho we nk’omuntu ekintu ekyabaire nikyoreka omutima gw’embabazi omubintu ebi yaabaire akora,” ripoota erikuruga omukibiina kye erikugira.

Annan akaheerezaho nk’omuhandiiki mukuru omubwire obw’orutaro rwa Iraq hamwe n’omukurwanisa endwara ya siriimu. Omugwa 1990 akashaba ku abaabaire bakwatsirwe omurutaro barekurwa omuri Iraq obu eihanga rya Kuwait ritaahirirwa.

Bwanyima y’emyaka 5, akakurira empindahinduka y’ekibiina ekirinzi ky’obusingye ekya United Nations Protection Force (UNPROFOR) kirikuhinduka kuba eky’amahanga ageteraine ekya Implementation Force (IFOR) kurinda obusingye omunsi yoona.

Omumpindahinduka egi, emirimo eyaabaire nekorwa omukyanga ekyabaire nikyetwa Yugoslavia ekahindurwa yateebwa omukibiina ekya North Atlantic Treaty Organization (NATO).

Ekyarugiriiremu n’okumuha obujunaanizibwa  bwa mukuru w’ekibiina ky’amahanga ageeteraine omugwa 1996 omukwezi kwa 12 kandi nawe nikwo kutandika encuro ye omukwezi kw’okubanza okwakuratsireho.

Omugwa 2001 ekibiina eki kikacwamu kyamwongyera encuro ya 2 kukyebembera emyaka 5 endiijo.

Ebiro 12.10.2001, Kofi Annan n’ekibiina ky’amahanga ageeteraine bombi mukono gumwe bakakwatsibwa ekiconco ahabw’omurimo gwabo omukurwanirira obusingye barikugira ngu akareeta amagara masya omukibiina eki, yayoreka gye oku UN yaabaire nerwanirira obugabe bw’abantu kandi yagaruka yataho n’okurwanisa ebikorwa by’obuzahambuki  n’endwara ya siriimu atarikwetiinirira.

Enshumi nkye ehwaire akabuganaho Purezidenti wa Zimbabwe, Emerson Mnangagwa, kandi obwo areebekire ari omumurimo gwe ogu abaire naakurira “Ba Kirinju” – ekibiina ky’abebembezi kuruga omunsi yoona barikukwatanisiza n’okukorera hamwe kurinda obusingye hamwe n’obugabe bw’abantu.

Ekibiina eki kikatandikwaho Nelson Mandela.

Annan akazaarwa ebiro 08.04.1938 omukyanga ekya Konfodoros omururembo Kumasi omuri Gold Coast hati erikumanywa nka Ghana kandi akashomeraho omuri Massachusetts  Institute of Technology, Yunivasitey’eby’okucondooza  eri ahansi ya Cambridge, omuri America.

Kuruga ogwa 1965 kuhisya 1983 akaba aine omukazi owaabaire nayetwa Titi Alakija kandi omugwa 1984 akaija yatunga omukazi orikwetwa Nane Maria Annan

LEAVE A REPLY