Owa FDC ariire obwa Ceyamaani, aba NRM baateera emeeza

306
0
SHARE

Dan Basibye

Bwanyima ya disiturikiti ya Kyenjojo kumara obwire buraingwa etaine ceyamaani w’eminyeeto, obwahati abakuru kuruga omu kakiiko kakuru k’eihanga akari kujunaanizibwa n’enshonga z’eminyeeto barugireyo bateeza akaruuru k’okutoorana araabe ceyamaani w’eminyeeto ahabwa Kyenjojo disiturikiti kwonka owa FDC niwe atwaire entebe egi bwanyima y’okuburwa omwetsimbireho.

Okuteera akaruuru aka kubaire omukishengye kikuru ky’okuhanuuriramu ahambuga nkuru za disiturikiti.

Moses Byaruhanga owa FDC kandi osingire akaruuru agizire ngu eminyeeto ya Kyenjojo eine ebizibu bingi nka okwebaganisamu kwonka naaza kukora ekirikubasika kureeba ebi byona yabimaraho.

“Tindikuza kugira ngu ogu n’owa FDC, kandi oriya tanteereire karuuru. Niinyija kukora omumuringo ogu ekiragiro kirikugamba hamwe n’omuringo ogu ekintu kiiziremu…” Moses nikwo agambeire abanyamakuru.

Bo aba NRM bangire ebirugire omuburuuru, ngu ahabw’okuba tibabaheereize bwire burikumara kutoorana omuntu waabo w’okwetsimba omukaruuru ako.

“Nitwe twacwamu nk’eminyeto ya NRM kandi twagamba nk’oku tutahairwe bwire obw’okutunga kandideeti owaitu. Itwe titwaza mubintu by’okuteera akaruuru n’ahabw’ekyo itwe titurikwija kuteekayo kandideeti weena. N’ahabw’ekyo nitwija kureka abaine ba kandideeti barabeho bataine kihakanisa kandi itwe nitwija kwebuuza ahabarikutukiraho kureeba eki turikubaasa kukora,” Francis Tugume owa NRM nikwo arikugira.

Ismail Mahamedi owa National Youth Council nagira ngu kumara emyaka 3, Disiturikiti ya Kyenjojo ebaire etaine mukuru w’eminyeto kandi okumanyisibwa ahagati ya disiturikiti na ekitebe ekikuri kubaire nikukorwa kwonka ogu n’omurundi gwa 6 barikuguma nibabwongyezayo obwo NRM erikuguma negira ngu tehairwe bwire burikumara kwetebeekanisa. “Omurundi gw’okubanza bakaha enshonga niyo emwe, oburuuru bwayongyezibwayo kumara ameezi 6. Omurundi gwa kabiri baaha enshonga niyo emwe nikwo kwongyezibwayo kumara ebiro 60. Ku byahwaireho twagaruka baatugira ngu tibakeeteekateekire. Twabaheereza ebiro 90. N’ahabw’ekyo hatwaireho okumanyisibwa okwo ahabw’enshonga emwe yonka kuruga omuba NRM kwonka ahamurundi ogu tucweiremu twahajaana n’abebembezi ba disiturikiti kandi twaikirizana ngu ahabw’okuganyirwamu kwa boona akaruuru aka kabeho,” nikwo Ismail arikugira

We Expedito Kagabe owaabaire naakora nka Ceyamaani naagira ngu, “Mbaire ninkora nk’orikwebembera eminyeto beitu haija baagira abantu abandi abacupwire ebihandiiko baabitwara ow’omuhandiiki mukuru baamugira ngu n’ab’okutoorana Ceyamaani, w’eminyeto, harikuburayo ebiro 3, obwo nyowe ntataireho mukono.”

Mahamedi Ismail akaruriire kuteera akaruuru agizire ngu Kyenjojo emazire emyaka 3 etaine ceyamaani w’eminyeeto  kandi  agizire ngu aba NRM barekye kwekwatsa ngu tibarabaheereize bwire burikumara ngu baitu  batwaire nibabagambira kuteera akaruuru  ako emirundi erikuhika 4 kwonka aba NRM batwaire nibekwatsa ngu obwire tiburikumara.

Bo bamwe ahaminyeeto ebaire eyetabire omu kuteera akaruuru ako  kandi ahamurundi nigwo gumwe nibo abeebembezi b’eminyeeto ahandengo z’ahansi bagizire ngu baine amashemererwa ahabw’okutunga ceyamaani w’eminyeeto ngu habw’okuba batwiire bataine ntunguuka yoona nk’abeebembezi b’eminyeeto handengo z’ahansi.

Gerald Aribatebeza nagira ngu akaruuru kabaire karungi munonga kwonka kitari ahabw’okugira ngu Moses arabaireho beitu ahabw’okugira eminyeto erugireho yatunga omwebembezi nka Kyenjojo kandi obaire ariho abaire ari omuntebe etaine mukama waayo. Nagumizamu agira ngu,”ebintu by’aharurengo rw’ihanga bibaire nibitufeera ahabw’okuba owaabaire natwebembera bakamuha obwebembezi obundi.”

Irene Kansiime, nawe omuteezi w’akaruuru nagira ngu, “Ababaire bari omuntebe babaire nibabanyigiiriza munonga, hakibaho nk’ekiiko n’ebindi, itwe kunuuya abantu b’omukyaro oshanga tutarikubikyenga.”

Akaruuru ako kahendire Mahamedi Ismail obaire akuriire kuteeza akaruuru ako arikurangirira Moses Byaruhanga nka ceyamaani w’eminyeeto habwa Kyenjojo disiturikiti.

 

LEAVE A REPLY