Abateire owa TV West Sheema bamanyirwe

655
0
SHARE

Adolf Ayoreka

Abashaija ababaire bari omukatabanguko k’orwokubanza ah’irwariro rya ICOBI omutauni ya Kabwohe ahi omushaki w’amakuru owa Kampuni ya Vision Group, Damba Wiziri, obwa hati baamanyirwe.

Abamanyirwe ni Charles Tashorora, orikukora omu office ya Elioda omuri Kabwohe, Robert Beijuka na Godwin Arikwera abarikureeberera eirwariro rya ICOBI omuri Kabwohe kandi erya Elioda Tumwesigye, oherize kurangirirwa nk’omujwekyerwa omu Ishengyero ahabwa Munisiparite ya Sheema. Abandi n’abaserukare  ababaire bebembeirwe Coleb Twesigye, omushugaanisa wa Poorisi n’ekyanga ahabwa disiturikiti ya Sheema.

Okurugiirira ahari Damba Wiziri, omushaki w’amakuru ahabwa TV West na Bukedde TV, kandi hati ori ahakitanda ah’irwariro rya Mayanja Memorial omu tauni ya Mbarara, akooherezibwa ekitongore kya Vision Group kuza Sheema kushaka amakuru omurukiiko orwabaire ruri omuri Sheema Hall orwabaire rwetsirwe Plan Virginia Mugyenyi ow’orubaju oruhakani orwa FDC oherize kusingwa Elioda Tumwesigye omuburuuru obuteirwe orwakataano orwa wiiki ehwaire.

“Bwanyima y’orukiiko, abashagiki ba Virginia bakatebeekanisa okutambura barikuraba omu tauni ya Kabwohe. Ku nabaire nkiriyo nimbakwata aharutambi, nkatunga okumanyisibwa ngu haine omushaija wa Boda Boda owaabaire ariyo nateerwa haihi n’irwariro rya ICOBI. Nikwo kucwamu ngu nyirukye mpikyeyo nkwate bimwe ahabyabaire nibigyenda omumaisho beitu ku naabaire nkiriyo ninkwatira entambi aha Boda ei naabaire ngyenzireho ntakatemburukireho, haine abantu abaanyetooroire barikungyema ngu ndekyere aho kukwata ebyabaire nibigyenda omumaisho. Naanye nikwo kurekyer’aho. Na bwanyima bangira ngu mbahe kamera yangye, ekintu eki naakozire ahabw’okuba nkaba ntarikubaasa kubarwanisa ahabw’okugira ngu bakaba bari baingi ntarikubaasa kubarwanisa,” nikwo Damba arikutebya.

Nayongyera agira ngu omubutikitiki bukye, bakamushamata baamutaasya omunda ya za geeti za ICOBI. “Bakatandika kuntuuntuza, batwara enshaho yangye, amasimu gangye, endanga muntu y’ekitongore ky’amakuru eki ndikukorera. Bwanyima y’akare kakye, Poorisi ekaija na motoka yaayo eijwire abaserikare. Nayeshengyereza  ku bangaruriza ebintu byangye beitu ntakaherize, Godwin na Charles bakankwata amaraka kandi baatandika busya kunteera obwo Poorisi eriyo nereeba etarikubaasa n’okubaasa kumpwera. Haine omupoorisi owabaire naaha ebiragiro ou ntarabaasize kukyenga kurungi. Akaragiira abapoorisi kunta ahamotoka ya Poorisi nikwo kuntwara bakaanaga ah’irwariro rya KabwoheHealth Centre IV. Niho naahereerukire kumanya ebirikufa omunsi. Bwanyima nk’eshanga omu irwariro rya Mayanja Memorial.

Ahaby’okutabaaza aha Poorisi, Damba naagira ngu tihaine oku yaabaire nabaasa kuza aha Poorisi kutabaaza obwo atarikumanya ebirikufa omunsi. “Nimpurira obusaasi bwingi munonga omumaraka ahi abashaija 3 baakwatsire kandi hati nziimbire. Okugamba bubaire buri obuzibu kwonka hati nimbaasa kugyezaho ahabw’obujanjabi obu ndiyo nintunga,” nikwo Damba arikwongyeraho atyo.

Kandi naagira ngu omukaruuru akaabaireho orwakataano, akaba ariyo naaha amakuru aba Reediyo ya Bukedde ahabirikuyenda omumaisho omukaruuru omumyanya emwe ahi okuteera akaruuru kaabaire nikagyenda omumaisho kuteerwa omubwire bwa shaaha 4 z’ekiro n’okurenzyamu kandi n’ahi ebintu bingi ebirikwebuuzibwaho byabaire nibigyenda omumaisho omunkambi ya Elioda. “N’ahabw’ekyo ku bankwatsire, bakabanza kushwijuma ahandanga-muntu yangye kuhamya ku ndaabe ndi wenyine owaashakire amakuru ago.”

Ogu n’omurundi gwa kabiri Damba arikukwatwa kandi akabonabonesibwa ekikoosi nikyo kimwe omuri Sheema. Orwakataano orw’okuteereraho oburuuru, akabonabonesibwa Jordan Amanya, orikwebembera egomborora ya Rugarama kandi omwe ahabarikwebembera Reediyo emwe omu disiturikiti ya Bushenyi. Bwanyima Damba akahayo omushango ahapoorisi ya Kabwohe ogwahandiikirwe omu namba ya REF: 40/27/07/2018

Marshial Tumusime, omugambirizi wa Poorisi ahabw’ekyanga kya Bushenyi empango agambeire ab’amakuru ngu tihaine n’omwe ou baakomire ahabikukwata ahakutuntuza kwa Damba arikugira ngu nibetaaga kubanza bacondooza oburugo bw’akatabanguko aka hamwe n’owabaire nakenegyeza.

“Torikubaasa kumara agakwata omuntu. Nitwetaaga kubanza twayetegyereza ekyarugiriireho endwano ezi ezaareeteire yaateerwa,” nikwo Tumusiime agizire.

Ku abuuziibwe yaaba haine abaserukare abaayejumbeire omukuteera omunyamakuru, Tumusiime abandize yarinda kukigambaho kandi nikwo na bwanyima kushaba abanyamakuru kubuuza Mukiza, omuduumizi wa Poorisi.

LEAVE A REPLY