Ekitongore ky’eby’obwegyese omuri Uganda kuhindura omu ngyenderwaho yaakyo.

260
0
SHARE

Edwyn Ram

Nk’omuringo gumwe gw’okutunguura omutindo gw’eby’obwegyese omu ihanga, ekitongorere ekirikurira hamwe n’okureebuuza omutindo gw’eby’obwegyese aha rurengo rw’amatendekyero g’ahaiguru ekya National Council for Higher education, kitandikire kampeyini y’okuhindura omu ngyenderwaho y’amatendekyero kubaasa kureetera haabaho omutindo murungi, okujanjara kw’obwegyese bwa University kwayeyongyera omu banya Uganda.​

Ebi bigambirwe omu rukiiko obu aba UNCHE babaire nibabuganaho bakuru b’amatendekyero goona ag’omuri Burengyerwa-izooba ahari University of Saint Joseph’s Nyamitanga omuri Mbarara.

Abeebembezi b’ekitongore ekya National Council for Higher Education abakuraire omushomo ogu ogw’izooba rimwe  babaire bakuriirwe Dr. Pamela Tibihikirira Kalyegira, Arthur Babu Muguzi hamwe na Dr Cyrus Ssebugenyi abashoboreire ahabw’enki hariyo nihabaho empinda-hinduka omungyenderwaho y’eby’obwegyese bwaza University  omu ihanga  habaho okujanjaza kw’obwegyese bwa University omu ihanga.

Arthur Babu Muguzi, orikwebembera ekitongore eki, amanyiise abanyamakuru ngu obw’ira okaba abantu bakaba bateeka-teeka ngu waaba otaherize siniya ya 6 torikuza mu Yunivasite. “Kwonka hariho abandi abantu abarikuba baine za satifiketi omuby’obuhingi, eby’emikono nk’okubaija n’ebindi byona. Nabo baine omugisha kutunga obwegyese burungi, kutunga engyenderwaho egi

Muguzi naagira ngu engyenderwaho egi ti ya Uganda yonka beitu n’ey’aharurengo rwa East Africa kubasa kurwanisa eibura ry’emirimo.

Muguzi nayongyera agira ngu abantu abaine obukugu hamwe n’okwegyesibwa nk’okwebitongore ebirimu amahe ,eby’obuhingi n’oburiisa n’ebindi bingi n’ab’okukuzibwa.

“Ekizibu ekitwine omu Uganda, ahabantu 100 abashemereire kuba nibaza omu Yunivasite, abantu 6 nibo barikuzamu bakatunga za diipuloma na za diiguri. Mbwenu noreeba ngu entunguuka yaitu neija kuba ekiri enyima, ahabw’okuba abantu bakye nibatunga obwegyese bw’ahaiguru kandi nibwo burikureetera abantu baashongoka, baashoborokyerwa reeru baakora ebintu by’entunguuka,” nikwo Muguzi arikwongyeraho.

Kandi we Dr. Cyrus Ssemugenyi nawe owa NCHE naagira ngu abanyamahe abaingi bakaba batunga obukugu bw’amaani beitu ku baabaire baruga omumahe, empapura zaabo zikaba zitaikirizibwa ahandi. N’ahabw’ekyo kikaba nikitaahiriza eihanga kushanga ngu gavumenti abantu abu esiisiireho sente nyingi kwonka ku barikuheza kuruga omumurimo ogwo tihaine ahandi ahi barikuza. N’ahabw’ekyo tukaba nitufeerwa abantu ab’obukugu munonga, kwonka kandi hati ekyo omumahe kikarugaho, kandi hati n’omubitongore ebindi twine amatsiko ngu nikiija kugyenda omumaisho kwenda ngu abantu nk’abo baaruga omubitongore  ebindi nk’omu Prisons bagumizemu barikukoresa obukugu obwo ahantu ahandi. 

Bakuru b’amatendekyero abahikire aha mukomo ogu basiimire ekitongore ahabw’engyenderwaho ensya oku erikwija kuhindura entunguuka y’ihanga kurabira omuby’obwegyese.

“Omuntu ku abaire natunga okuteganisibwa omurugyendo rw’okushoma, atyo akaba abyemereizeho, obumwe ateekateeka ngu tarikwija kubaasa kweyongyeraho. Kwonka hati twamanya ngu omuntu naikiriziwa kugaruka akatandikira ahu yaabaire yakoma atyo akeeyongyerayo.” Sandra Akankwatsa owa MISD nikwo arikugira

LEAVE A REPLY