Abasiraamu kurundaana ebintu by’abaana abataine kihwera

333
0
SHARE

Christopher Ahimbisibwe

Bwanyima y’abasiraamu omu ihanga ryona kutandikaho ekisiibo kyabo ekitandikire ebiro 17.05.2018, abasiiramu aba Disiturikiti eya Mbarara, bakwataniise n’ab’Orumuri, Radio West na Tvwest batogoizeho ehururu y’okurundaana ebintu by’okuhwera abaana abataine kihwera omubwire  obw’ekisiibo.

Ori Disiturikiti Kadhi ahabwa Mbarara hamwe na Kiruhura Sheikh Mukwaya naagira ngu abantu boona nangwa n’abatari basiraamu baine kukwatanisa nabo omuhururu y’okureeba ngu bahwera na munonga abaana bato abataine kihwera.

Orikwebembera ekitongore ekya Iqra Foundation Abdul Kasule naagira ngu  omubwire obu obw’ekisIibo burI omwe naaba aine kwehayo kandi nka ba Iqra Foundation batandikire kurundaana ebijwaro, saabuuni n’ebintu ebindi by’okuhwera abantu abaine obumuga, empungi, embohe hamwe n’abaana abanagirweho bataine kireeberera.

Manegya wa TV West, Ronald Satana, naagira ngu ti murundi gw’okubaza Orumuri, Radio West hamwe na TV West barikukwatanisa n’abasiraamu omuhururu y’okurundaana ebintu by’okuhwera abantu batari bamwe na bamwe kandi nibongyera kugumizamu. Aha niho yaashabira abareebi n’abahurikiriza boona kwejumbira omuhururu egi.

Abarikuba baine ebintu ebirimu emyenda na munonga ey’abaana bato, ebyokurya nk’obuhunga, omuceri, sabuni, ekaito nimubasa kubireta aha ofiisi za Radio West Booma, aha Iqra Foundation, ahamuzigiti ogwa Abubakari (Supreme Council) hamwe n’aha muzigiti ogwa  Madrasat Hamuza. Nk’oku abasiraamu barikuteekateeka kusiiburuka ebiiro 16/06/2018, obwe bakwataniise na Orumuri, Radio West hamwe na TV West nibaza kugaburira abantu boona ah’izooba ry’okusiiburuka. Emikoro yoona neija kuba eri aha muzigiti ogwa  Madrasat Hamza.

LEAVE A REPLY