Entaro z’amataka omuri Kyenjojo ziimukire busya.

418
0
SHARE

N’ebya Dan Basibye

Abataka kuruga omuri Nyakabara Kyenjojo Tauni Kanso omu disiturikiti ya Kyenjojo obwahati bashobeirwe bwanyima y’entaro z’amataka eziimukire ahagati y’abaana enfuuzi z’omugyenzi Topisita Kasozi hamwe n’abantu abaguziibwe eitaka eri kandi amaju garikuhika 6 nigo gashenyirwe bwanyima y’abaana abo kutunga ekiragiro kuruga omu kooti kiri kubaikiriza kukozeesa eitaka eri.

Bamwe ah’abaana b’omugyenzi kandi abariyo nibayombera eitaka ryabo nibagira ngu bakazaarwa bari abaana 9 kandi buri mwana akatunga omugabo gwe kwonka mugyenzi waabo Abigaba Francis akatandika kutunda eitaka ryaabo omubutahikire.

“Kwonka hakarugaho ceyamaani, na bagyenzi baitu, Abigaba Francis na Ahaisibwe Steven, bwanyima y’okuruga kuguza emigabo eyaabo baija bagaruka aha ya bagyenzi baabo kuguza,” Ann Nalubega omwe ahari banyanya ba ba kiguza nikwo arikugambira TV West.

“Munyanyazi itwe na ceyamaani bahungire, titurikubareeba. Ba ceyamaani mwegarukyemu murekyere aho okutuguriza ebintu kandi Purezidenti Museveni nitukushaba otuhwere ahari ba ceyamaani ba L.C 1,” Maria Nansamba nikwo arikugira.

Abataka b’ekyanga eki nibagira ngu abantu abo abashenyiirwe amaju gaabo bakagura, kwonka ekirikutangaza amaju gaabo gashenyirwe ngu kandi enshonga ezi zoona nizireetwa ba ceyamaani L.C 1 abarikuguza ebintu omu butahikire.

“Abantu aba n’abashuma munonga. Titurikumanya yaaba n’ahabw’okumaramu obwire bwingi beitu ceyamaani ebintu ebi arikukora tibiriyo,” omwe omubatuuragye abakwatsirweho nikwo agambeire TV West.

Bo bakama b’amaju agashenyirwe bagizire ngu baine obusaasi ahabw’okuba bafeereirwe sente nyamwingi ngu kandi bakaba bariire naaza rooni kuruga omumabanka gatari gamwe na gamwe kuza kugura ebintu ebi eki baagizire ngu gavumenti erugyeyo ebayambe.

“Nteiremu sente nyamwingi omukutebeekanisa eitaka eri oteiremu n’okurigura. Obwahati ndiyo ninfeerwa miriyooni zirikuhika 150,” Ben Guma owaaguzire nikwo ahuriirwe arikugira.

Kandi we Steven Basaija ashangirwe ari omukutonzya agumize ngu, “…ahabw’okugura poloti yangye nkagitamu sente zangye kaashi haza nkashanga bagisiisire, nimpurira nyine obusaasi bw’amaani munonga tindikumanya n’ahi ndikubaasa kutandikira. Ninshaba Gavumenti etuhwere.”

We omuduumizi wa Pooriisi y’omuri Kyenjojo, Kawalya James, naagira ngu bakurateire amateeka ngu ahabw’okuba bakatunga ekihandiiko kuruga aha pooriisi enkuru eya Kibuli eky’okurinda aba court bailiffs kureeba baafurura abantu abaayombekire ah’itaka eri.

“We n’omwojo kandi eitaka eri ariyo naguza n’ery’abaishiki. Nikwo abaana b’abaishiki kuza omukooti kubaasa kucungura eitaka ery’omugabo gwabo. Aho kooti nikwo kuhayo ekiragiro ngu abantu aba barugye omu itaka eryo. Kandi ekiragiro kitambuziibwe omumadaara agahikire kuruga Kibuli, kuraba owa RPC kuhika owa DPC ngu mpe bailiff oburinzi arikufururaho abantu abo,” nikwo Omw. Kawalya arikugamba.

Ayongyeire yarabura ba ceyamaani L.C 1 kwetantara kutunda amataka agarimu entaro ngu ahabw’okuba ahamuheru gwa byona omuntu ou orikurahira okamuguza itaka orikumugira ngu rihikire ti ry’ebeho, nyencakare naija kukwehindukana arikukutabaariza omub’ebiragiro nk’oku ori omuyaayi

Ahutuhandikiire ebi titubasize kugambaho na ceyamaani L.C 1 w’ekyanga eki arikumanywa nka Kyomuhendo Nathan hamwe na Abigaba Francis ahabw’okuba babaire batorokire batari mukyanga.

LEAVE A REPLY