Embariirira ya Mbarara y’omwaka 2018-2019 yaashomwa.

1244
0
SHARE

Gaashakwa: Susen Ndyamuhaki

Eriizooba Munisipo Kanso ya Mbarara yaashohoza embariirira  ahabw’omwaka 2018-2019 kubaasa kuhajaanwaho kandi amaani amaingi baagata omuby’obyegyese.

Sente zirikuhika obuhumbi 23, na miriyooni 931 n’obundi bucweka omu sente za Uganda nizo kanso ya Mbarara eine omunteekateeka ahabw’okutambuza emirimo ya Munisiparite ahabw’omwaka 2018-2019.

 

Aha niho Meeya Robert Mugabe Kakyebezi yaagirira ngu Mbarara eine kutunguuka obwo agumize ngu omurimo gw’okwombeka akatare ka rwagati guriyo nigugyenda omumaisho n’obu baraabe nibateganisibwa enjura nyamwingi.

“Okwombeka kuriyo nikugyenda kurungi omumaisho n’obu turaabe twine ekizibu ky’enjura nyingi eziriyo nizikyendeeza sipiidi y’abombeki,” nikwo Kakyebezi arikugira.

Embariirira y’omwaka 2018-2019 ni kimwe kya kabiri ky’ey’omwaka 2017-2018 beitu okurugiirira ahari Minisita w’eby’esente, nibaija kutunga sente kuruga omu Gavumenti hamwe na Banka y’ensi yoona kubahwera .

“Hariho sente ezi Minisiture ehikire kuba neetuheereza, kwonka omuhendo nigwo tutakamanyire, kandi ezi turikuteekateeka ngu omwaka gw’eby’esente ogu gutakahwaire nitwija kutunga sente ezo. Niyo nshonga ahabw’enki embariirira egi yaakyendeeraho,” Benon Kajubi, Minisita w’eby’esente omukanso nikwo yagambira TV West.

Ceyamaani w’entebe ya 5 ahabwa Disiturikiti ya Mbarara JB Bamuturaki yaashaba abeebembeezi kutamu amaani omumirimo yaabo na munonga okukora enkuuto n’okushorooza emishoro agumize ati, “Twine okukyererwa kwingi na munonga omuby’okukora enguuto n’ebyombeko. N’ahabw’ekyo ninta omwete omuri ba Memba abari ahabukiiko oburikukwatwaho kwebembera ekintu eki kandi bakaguma nibebembera tiimu z’abakozi”.

Embaririra y’omwaka 2018-2019 n’eyo kuhaajaanwaho etakahinguziibwe kandi orukiiko oru rwaba rwebembeirwe omuhwezi wa Sipiika Robinah Kainobwisho.

LEAVE A REPLY