Ebya S.6: Abaremirwe obubonero bwa Yunivasite beeyongyeire

310
0
SHARE

Ekitongore eky’ebigyezo eky’ebibuuzo by’amashomero nari shi UNEB eriizooba kyashohoza ebirugire omubigyezo bya siniya ya 6 omwaka ogwa 2017 kandi byayoreka ku okukora kurungi kukyendeire wagyeragyeranisa n’omwaka gwa 2016

Abeegi barikuhika 101,269 nibo baayehandiikiise kushutamira ebibuuzo ebi ahabw’omwaka gwa kuruga ahamyanya y’okukoreraho erikwingana 1,918 kandi omuri aba, abeegi 100,066 nibo bashutamiire ebibuuzo.

Abeegi b’abaishiki abaashutamiire ebibuuzo ebi nibahika 41,932 kandi omubaro ogu nigukora obucweka 41 ahari 100 ahamubaro gw’abeegi boona abaashutamiire ebibuuzo. Kishangirwe ngu habaireho okukyendeera omubaishiki abarikushutamira ebibuuzo kandi wagyeragyeranisa n’omwaka ogw’enyimaho, hakyendeireho abeegi b’abaishiki barikwingana 1,000.

Ebirugire omubibuuzo ebi nibyoreka ngu okukora kubi kw’abeegi kureebeirwe omumubaro gw’abeegi abakozire gye amashomo garikuhika 2 nari 3.

Omubaro gw’abeegi abakozire gye amashomo garikuhika ashatu gukyendeire kuruga ahabeegi 39,797 omugwa 2016 kuza ahabeegi 34,819 omugwa 2017, ekirikworeka okugwa okurikwingana obucweka 4 ahari 100. Kandi n’abo abakozire gye amashomo 2 (ekirikumanyisa ngu nibabaasa kwegaita/kwakiirwa ah’itendekyero ryona ery’orurengo orurikukurataho) nabo bakyendereire ahabucweka 5 ahari 100 wagyera-gyeranisa n’omwaka ogwa 2016

Eki nikyoreka ngu omubaro gw’abeegi abarikubaasa kwegaita nari kwetwa aha Yunivasite gukyendeire n’abeegi 6,687 wagyeranisa n’ab’omwaka ogwahwaire.

Omumatendekyero agandi ahi orikushanga nibatwara omwegi ohikire gye eishomo rimwe kandi agandi abiri agyerizeho, omubaro ogurikwingana abeegi 83,301 nibo barabireho kuza omumatendekyero ago wagyeragyeranisa n’abeegi barikwingana 88,659 omugwa 2016

Beitu UNEB nibagira ngu okugwa kw’abeegi kubaire kuri kukye munonga barikugira ngu heyongyeireho entaaniso y’abeegi 301 bonka.

LEAVE A REPLY