Aba Boda nibaija kujwara ebigofiira ebirikureeberwamu – Museveni.

229
0
SHARE

Edward Muhumuza

Nka gumwe aha miringo misya erateebweho kukyendeeza obwinazi obukanyire omu ihanga, Purezidenti Museveni agizire ngu naija kwihaho ebijaketi by’abavugi ba bodaboda ebi barikujwara aha mitwe.

Arikugambira enkuyanja y’abantu ehikire aha kushendekyereza obaire ari MP wa Arua Municipality, Rtd Col. Ibrahim Abiriga hamwe n’obaire ari omukuumi we kandi omurumuna, Saidi Congo, Museveni agizire ngu buri muvugi wa bodaboda weena naija kujwara ebikofiira ebirikureeberwamu kandi nibiza kuba biriho enamba.

Arikugambira abantu abahikire aha kuziika omu kyaro kya Lukodu ekiri omu gomborora ya Rhino omu disiturikiti ya Arua, Museveni ahamisiriize ngu aine amatsiko ngu abo abitsire Abiriga n’omurumuna nibaija kukwatwa kandi bakorweho nk’ebiragiro oku birikuragiira.

“Nashasha munonga, kwonka nyine okwikiriza ngu abainazi aba nitwija kubakwata. Batandikireho orutaro kandi baita abantu baitu, kwonka hati nibaija kureeba eki NRM erikumanyisa omurutaro,” Museveni nikwo agambeire abantu omuri Arua.

Abiriga, oferiire aha myaka 68 y’obukuru n’omurumuna Congo bakateerwa amasasi abantu ababaire bajwire ebijaketi obuyabaire ari hakye kuhika omu maka gye agari Kawanda omu disiturikiti ya Wakiso.

Ekikorwa eki ekyabaireho orwakataano wiiki ehwaire kikashushana n’okubaitsire owabaire ari omugambirizi wa pooriisi Andrew Felix Kaweesi hamwe n’omuramuzi Joan Kagezi na Maj. Kigundu. Museveni arabwire abo abarikwita abantu ngu naija kubakwata kandi abakoreho.

“Bakaita Kaweesi. Baita Joan Kagezi. Enshumi nkye ehwaire Suzan Magara bakamukwata kandi baheza baamwita. Mbwenu hati baita Abiriga. Buzima hati nibwo bwire bw’okwimuka tukabagambira ngu barekyere aho. Kandi nitukibaasa,” Museveni.

Ayongyeire yagira ngu aine amatsiko ngu abaitsire Abiriga bamutuzire eby’obutegyeki na munonga okuhagira ekibiina kya NRM okufeeraho eki agizire ngu nikimutangaaza kureeba ngu ekibiina kya NRM ekiine abantu baingi tikirikwejumbira omu bikorwa by’okwita abo abarikukihakanisa.

“Torikubaasa kushanga omuntu omunju ye, okamwita. Aho n’iwe orikuba ori empunu. Omurwani tarikubaasa kwita omuntu ou arikushanga owe ashutami nari arikuba ari omumotoka eya buriijo.”

Purezident agizire ngu gavumenti neza kwongyera amaani omu by’okukyondooza n’okukyendeeza okushashamaza amakuru agarikubaganisamu abantu aha mikutu ya intaneeti ebi agizire ngu nibikozesibwa abantu abarikuhakanisa gavumenti kuhemba omuriro omu banya Uganda.

Arikugamba ahaby’okwerinda, Purezdenti agizire ngu, “Omwitsi ari nk’empitirizo omumutuumo gw’ebinyatsi by’enyamaishwa. Tikirikwetaagisa kureeta abaserikare baingi kuronda empitirizo.”

Abagambi aha rufu bajumiriire ekikorwa ky’okwita abantu omu muringo nk’ogwo kandi bashaba gavumenti kwongyeramu amaani kurinda amagara g’abanya Uganda.

LEAVE A REPLY