Poorisi egaaniire ahabya kamera za CCTV omuri Kampala

186
0
SHARE

Tiimu ya poorisi ya Kampala Metropolitan Police obwo eyebembeirwe  CP. Moses Kafeero Kabugo ebugaine n’ekitongore ekindi omu poorisi ekirikukora ahabya kamera ezirikutata nari shi Polive CCTV Surveillance Department ebiro 25.0. 2018.

Okubuganaho oku kubaire ahakitebe kikuru ekya Poorisi eya Naguru n’ekigyendererwa ky’okwetegyereza enkoresa ya kamera ezo hamwe n’okugambira ahabakozi b’orubaju orwo ahakukyendeeza ahakukora ebihagaro omururembo barikukoresa kamera ezi.

Obwo arikugambira tiimu egi ey’orubaju orurikukoresa kamera, okushugaanisa tiimu egi hamwe na tiimu z’abaserikare na ba kamanda kukaabaire kuri okw’obuhwezi buhango omukugyezaho kukora ahabihagaro ebirikubaho, na munonga omubiimbuuro by’abantu omumyanya erikurahuka kukorerwamu ebihagaro ebi.

“Entambi za kamera ezi ku zirikunywana kurungi n’omuringo ogwa potoro ogwa 999 hamwe n’akacweka akarikukora ahambeera ezirikwetaagisa obuhwezi bw’aho n’aho, niziija kwongyera kuhwera omukucondooza okurikukira kukorwa ab’eby’okwerinda hamwe n’okureeba oku embeera y’entambura y’ebiiruka eyemereire omubwire hamwe n’okukora ahabizibu ebirikureeterwa omumbeera ezo,” nikwo agizire.

Okubuganaho oku nikwijaho bwanyima ya Mukuru wa Poorisi Okoth Martins Ochola kushwijuma omukyetaago ky’emikorere yaazo hamwe n’okuronda emiringo y’okukyendeza ebihagaro barikukoresa za kamera entatsi omururembo rwa Kampala.

Ochola agizire ngu omuringo gwa poorisi gw’okukyendeeza ebihagaro kusibiire amakanda ahakwerinda emishango, okureebeka ngu emirimo ei poorisi erikukora nereebwa kandi na poorisi nereebeka omuukicweka beitu na kamera ezi niziija kwongyerera ahamaani aga ag’okwerinda enkozi z’ebihagaro.

N’obu amahanga agatunguukire nka Bungyereza gari gamwe ahamahanga agarikukira kureebwa za kamera omunsi yoona, na za kamera zirikuhika miriyooni 4 omu ihanga ryona, orurembo rwa Kampala neehisya kamera 1900 eziri omumaka g’abantu na ebyombeko by’eby’obushuubuzi nk’amahoteeri, emyanya y’okugurizamu ebintu, ey’okushemerererwamu kandi ezindi zibyairwe ahantaagurikano z’emihanda kuhwera ahakwerinda enkozi z’ebihagaro ebirimu obushuma n’ebindi.

N’obu okutamu kamera ezi kiraabe kiri ekiteekateeko ky’amagyezi kurwanisa ebihagaro omururembo, nikyetaagisa abarikuteekateekyera orurembo oru nka Kampala Capital City Authority (KCCA) hamwe n’ebindi bitongore ebirikukwatwaho kwija n’emitindo ei ebyombeko byona bishemereire kuba biriho reeru nikwo bakama b’ebyombeko ebyo babaase kutaho kamera ezo ezirikushwijumwa buri mwaka kandi abari kuhenda ebiragiro bakakorwaho nk’oku kirikwetaagisa.

Kandi eki nakyo nikyetaagisa muranga kwakiira enkora egi y’okurinda ebihagaro omubyanga nk’omuhanda ogurikuhwera ahamiringo endiijo nayo ey’enkora ya tekinologiya ereetsirweho ebitongore by’eby’okwerinda.

LEAVE A REPLY