Aba Kashari North bashaziremu kutandiika burungi bwansi

230
0
SHARE

Christopher Ahimbisibwe

Kaingi abantu batwire nibetomboitira Gavumenti ahabw’obutafayo kureeberera enguuto na munonga  enguuto ez’ebyaro, ezi abantu barikukoresa kurabyamu eby’emishuuburo yaabo. Obwahati abebembezi ab’omuri Kashari North bashaziremu baatandika ehururu y’okureeba ngu baagaruraho enkora eya  Burungi-bwansi erabahwere kwigura emihanda y’ebyaro ei barikutuuramu.

Abebembezi ehururu egi bagitandikiire omu gomborora eya Kashare omu muruka ogwa Mitoozo omukyaro kya Ntungamo eishaza erya Kashari North ahu Baziri Bataringaya ori Kansara LC5 ahabw’egomborora ya Rubindi kandi ori omuhandiiki w’eby’esente ahabwa Disiturikiti ya Mbarara hamwe na Mugisha Mark ori Kansara ahabw’egomborora eya Kashare barikugira ngu Burungi-bwansi ekaba ehwereire enguuto z’ebyaro obutafa.

Kansara Mark naagira ngu  nk’egomborora eya Kashare sente  ez’okuboneza enguto niziba zirikye n’obu baraabe nibagyezaho kurundaana pasenti ya 25 ya ba ceyamaani  ngu obundi ekaagira eki yaakora nabwe nibyanga, nikwe kusharamu kutandikaho ehururu egi.

Omuhanda ogu baboneize n’ogubaire gwijwiremu ebiti bikuzire, ebiina hamwe n’ebishaka ebibaire byaremeise abantu kurabamu kandi ogurikukoresibwa ebyaro ebirimu; Ntungamo, Rwemondo, Rwembabi, Kashare, Kitongore Kanama hamwe na Kahingo.

Kurugiirira ahari OC station ahabwa Rubindi ASP Abel Jwenge obaire ayebembire aba Poriisi ba Rubindi  kukwatanisa n’abataka omu kukora Burungi-bwansi, naagira ngu nk’abeby’okwerinda n’omurimo gwabo kureeba ngu bakwatanisa n’abantu  n’ekigyendererwa ky’okureba ngu baamaraho ebizibu by’obushuma hamwe n’okureeta obusingye.

Naagira ngu nka Poriisi okukwatanisa n’abataka omu kukora Burungi-Bwansi nikibahwera munonga ahabw’okuba nibareetaho enkwatanisa nungi n’abantu. Nayogyera agira ngu eki nikibahwera kumanya ebizibu ebi abantu baine hamwe n’eki barikwenda ngu Poriisi ekore.

Abebembezi nibangira ngu ehururu egi eya burungi bwansi  ei  bagitongoize kandi bakareeba abantu bagyejumbiramu nibaza kushomesa abandi bebembezi omu Disiturikiti eya Mbarara  kureeba ngu amagomborora goona gatandikaho enkora egi erahwere kumaraho emihanda mibi omubyaro.

LEAVE A REPLY