Toto Kids Festival egarukire! Na sente z’okusingura

217
0
SHARE

Toto Kids Festival egarukire! Na sente z’okusingura

ANDREW TUSHABE

Ekinihiiro ky’abaana ekirikukirayo okucamura n’okushemeza Burengyerwa-izooba yoona kigarukire.

Ekiivuru ky’abaana ekirikumanywa nka Toto Kids Festival kandi ekyatandikirweho akatabo k’abaana aka Toto  omwaka oguhwaire nikiija kuba kiri Kakyeka ogundi omurundi omukihuumuro eki ebiro 13.05.2018.

Beitu ahamurundi ogu, Toto Kids Festival omuri Mbarara neija omumuringo ogurikurongoora abaana kurabira omukusingura ebiconco bya sente zirikwingana miriyooni 2 omumworeko ogw’okuronda entaranta z’abaana. Abaana abaine entaranta omukuhandiika (poems), okweshongora, okusiiga ebishushani hamwe n’okukwora emishono y’okujwara (Fashion) nibashabwa kworeka entaranta ezo ah’izooba eryo kandi oraabasingye nabaasa kwehangurira sente.

“Nitwenda abaana batutebeze emboozi ezikwatiraine n’amaka agu barikurugamu barikurabira omukuhandiika poems, omukweshongora, okusiiga ebishushani (paintings), hamwe n’okworeka emishoni y’enjwara etari emwe n’emwe (Fashion). Nitwija kurongoora abasinguzi bashatu ab’okubanza barikubaha sente. Omwana oraayetabe omumpaka za modeling akasinga nawe naija kwehangurira endagaano y’ekishaju na kampuni emwe erikuronda abaana b’okuresa ahabintu byabo by’eby’obushuubuzi.

Ekirikwetaagisa n’omwana kutunga akakongi ka Toto Festival akarikwija omurupapura rw’Orumuri hamwe n’omukatabo ka Toto akarikwija omurupapura rwa The New Vision orwakashatu. Akakongi ako, omwana, naija kukaijuza, akareete ahamiryango y’okutaaha omuri Kakyeka eizooba eryo reeru ayegaite omuri abari omumpaka z’okusherura entaranta,” Barbara Nyamwiza orikukora puroguraamu y’abato aha Radio West na TV West nikwo agambeire abeegi ba Mbarara Preparatory School obu abaire ari omuhururu y’okubamanyisa ahakiivuru eki.

Oyihireho okusherura entaranta, abatebeekanisa nibagira ngu abaana nibaija kushemererwa kurabira omubintu bingi nka okuvuga endogoya n’engamiya, okusiiga ebirangi ahamaisho, okuzaanira omumaizi, okuguruka omu bouncing castles na trampoline hamwe n’okwereebera abeeshongozi baabo nyamurungi ahari shiringi 10,000 abato na shiringi 5,000 abakuru.

Obwa hati abaana kuruga omuri Burengyerwa-izooba yoona nibooreka ekihika ky’amaani nk’oku barikwenda kuba bari omukiivuru eki. “Ahamurundi ogu, ninyija kweshongora nzine kandi nzaane n’emizaano yoona,” Daniela, omwegi kuruga ah’ishomero rya New Jay Bee International School, Mbarara nikwo arikugira. We Amanya Emma owa Mbarara Modern School ashabire abatebeekanisa b’ekiivuru eki kumureetera omweshongozi Fik Fameica kweshongora.

Toto Festival neebaho okwenda ngu obwongo bw’omwana bugarukye busya kuruga omubitabo ebi barikuba barimu obutahuumuza ah’ishomero hamwe n’okubugana bataahi baabo kuruga omumashomero agandi.

LEAVE A REPLY