Nomzamo Winifred Madikizela-Mandela

514
0
SHARE

Nomzamo Winifred Madikizela-Mandela, owaarwaniise obutegyeki oburikushoroora omunganda omuri South Afrika kumara obwire buraingwa, yaafa eriizooba.

Omuhwezi we‚ Zodwa Zwane‚ yaahamya amakuru aga eriizooba orwokubanza omu ihangwe.

“N’eky’obusaasi bwingi okubamanyisa ku Omuky. Winnie Madikizela-Mandela yaafa obwo ari ah’irwariro rya Netcare Milpark, omuri Johannesburg, South Africa orwokubanza ebiro 02.04.2018.

“Yaafa bwanyima y’okurwara kumara obwire buraingwa oburwaire obubaire nibumureetera atarikwosha omu irwariro kuruga omwaka ogu gutandika. Omugyenzi yatwarwa omubusingye orwokubanza oru, ayetooroirwe ab’eka ye n’abanyamikago,” eka ye nikwo yaagira.

Eka neija kushohoza enteekateeka z’okumushabira n’eby’okuziika ku ziraaheze kukorwaho.

Akazaarwa omuri Bizana omu Eastern Cape, South Afrika omugwa 1936, akaza omururembo Johannesburg kushoma eishomo rya Social Work bwanyima y’okwetwa aha Yunivasite.

Omugwa 1957, akabugana Nelson Mandela, owaabaire ari omutonganirizi, omurwanirizi w’abantu kandi owabaire narwanisa eby’okushoroora omunganda. Bashwerana omwaka ogwakuratsireho. Bakazaara kumwe abaana 2.

Beitu obushwere bwe na Mandela bukaba buri obw’akaire kakye, bwanyima ya Mandela kukwatwa omugwa 1963 nikwo akakomwa amagara gye goona ahamishango y’okureebya eihanga. Mandela akaija yaarekurwa omugwa 1990.

Obwire obu Mandela yaabaire ari omukihome, Madikzela nawe tarahonire abaserikare abaabaire nibakorera gavumenti erikushoroora omunganda. Madikizela bakamukoma obutaruga munju ye kandi haine n’obubaamutwara Brandfort, etauni emwe omukyanga ekya Free State.

Omugwa 1969, Madikzela-Mandela akabaho omwe omubantu abaabandize kukwatwa ahamishango y’obuzahambuki, ahansi y’ekiragiro ekyabaire kikozirwe 1967. Akakomwa kumara ameezi 18 obwo akomirwe wenka omukihome kya Pretoria Central Prison atakacweriirwe mushango .

Omugwa 1991, akateebwaho omushango gw’okubuzaho Stompie Seipei, omwe omubarwanirizi b’embeera enungi owaaitsirwe omwe ahabakuumi be.

Omukuumi wa Madikzela-Mandela akaba akwatsire Seipei omugwa 1989, hamwe n’endiijo minyeto kuruga omuka y’omunyadiini omwe, Paul Verryn.

Beitu okukomwa emyaka 6 kukaija kwahindurwamu nikwo kuteebwaho omutango hamwe n’emyaka 2 bwanyima y’okushaba kooti

Obushwere bwe na Mandela bukatandika kushenyuka bwanyima ya Mandela kukomoororwa.

Akabaruha aku Madikizela yaabaire ahandiikiire omukundwa we ondiijo omuto, kakaija kaahenderera omumpapura z’amahurire.

Bimwe omubigambo ebi yaabaire ahandiikire omukabaruha aka bikaba nibishoma ngu, “Oriyo noyetooroora nobyama n’abandi bakazi ahabw’enshonga etarimu na makuru,” nikwo yaahandiikire.

“Eky’okugira ngu mbaire ntarikugamba na Tata (Nelson Mandela) kumara ameezi 5 ahabwawe obwahati tihaine ekikikukwatiire. Ninguma ninkugambira ngu embeera omuka neguma neyeyongyera okuba kubi. Torikwefeerayo ahabw’okuba nooba oyine omukazi omukitanda burikiro,” nikwo Madikzela arikugambwa kuba yaahandiikire.

Omukitabo kye ekya Odyssey to Freedom, omuhorereza George Bizos nashoboorora oku Mandela yaabaire ayanga kuza omunkiiko z’okwebuuza ahaby’amateeka ezi Bizos yaabaire aba aine na Madikzela-Mandela omumushango gwa Seipei.

“Akataho ensharo omukuza omunkiiko zaitu ez’okwebuuzaho, ahabw’okugira ngu enkiiko ezo nazo zikaba zeetabwamu rooya ogu… omukundwa we omubwire obwahereerukireyo Mandela ari omukihome hamwe n’obu arekurwa,” nikwo Bizos yaahandiikire omukitabo kye.

Ababiri aba bakataana omugwa 1996, bwanyima y’emyaka 37 omubushwere

Bwanyima y’akaruuru k’okubanza ak’enkora ya demokurase omugwa 1994, Madikzela akajwekyera eishengyero kandi yaaheebwa obwa Minisita bw’eby’enzaarwa n’entaranta. Kwonka Mandela akamubinga bwanyima y’okukora orutaayaayo rurikuza Ghana atahairwe bushoborozi.

Akaguma ari MP kuruga obwo n’obu araabe abaire atarikukira kuza omu ishengyero emyaka mikye ehingwire.

Omugwa 2016‚ akaheebwa ekitiinisa eki barikweta “Order of Luthuli” omumudaari gwa Silver omumukoro gw’okugaba emidaari y’ihanga ahabw’omuganda gw’amaani ogu yaahaire omurutaro rw’okucungura abantu ba South Afrika.

Byarundaanwa: Andrew Tushabe

LEAVE A REPLY