Banka z’eby’obushuubuzi zibaasa kwija kuburwa ba kasitoma

294
0
SHARE

Halson Kagure

Abahangu omuby’obushuubuzi nibagira ngu za Commercial Bank zaaba zitahindwire omunkora yaazo, ebibiina bya Biika-Oguze biriyo nibizitwaraho abantu.

Beitu bamwe aba banka nibagira ngu bakiri omukatare k’okuhaya-hayana n’ebigombe bya Biika-Oguze ahabw’okuba nabyo nibibiika nabo. Robert Asiimwe, omushugaanisa w’ekigombe kimwe ekya Biika-Oguze naagira ngu obwa hati nibateebereza ngu SACCO eziri omu ihanga nizirenga 4000 n’obu zimwe aharizo zitaine bihandiiko by’okuhamibwa.

“Eky’okubanza, abantu bibateiremu omutima gw’okubiika. Ekya kabiri, beegiise abantu okumanya kukora bizinensi,” Robert Asiimwe omushugaanisa wa Uganda Cooperative Alliance nikwo arikugira.

Ogu nagira ngu haihi buri gomborora yoona eine ebibiina bya BIika-Oguze kandi kurugiirira ahabeebembezi bamwe abi tuganeireho nabo, haihi obucweka 99 ahari 100 bw’abantu abari omubibiina ebyo n’abahingi abaabire nibateganisibwa okushashura amagoba garengyesereize omu za Commercial Bank, zeete banka z’eby’obushuubuzi.

We Fulgence Twinomugisha, Ceyamaani wa Ruhiira SACCO, omuri Isingiro naagira ngu, eky’okureeberaho, ni kasitoma wa za banka nyingi, kwonka tibakamweta ga omunkiiko zaabo eza boona ez’omwaka. “Nindya rooni omumabanka maingi. Kwonka tinkareeba ga bagizire ngu aga n’amagoba agu twakuteera ahamigabo. Na nyine tinkareebaga magoba. Ku barikuza kukuheereza amagoba bagira ngu esente obanze ozite ahankora ya Fixed Account.

TV west erikugaaniraho na Robert Asiimwe orikukurira ebibiina bya biika oguze omuri Burengerwa-izooba TV West emanyisiibwe ngu n’obu baraabe baine ebizibu ebirikuteganisa abahingi omukubiika, obwa hati bateire omunigo ahari za banka z’eby’obushuubuzi obwe arikushoboorora ati;

“Banka z’eby’obshuubuzi ku zirikukuha looni y’ente 2 zikashanga oine ente emwe nari otaine ei oine, torigarukayo. “Kwonka SACCO n’obu orikugira ekizibu noshanga nibakugira ngu mbwenu omushana gwakuteire, reka tukwongyereyo ameezi 6 agandi,”

Dokita Rodgers Bariyo omukugu omu mashomo g’embariirira hamwe n’obushubuzi aha Yunivasite ya Mbarara nagira ngu amagoba g’ahaiguru aga za banka z’eby’obushuubuzi ni zimwe ahanshonga ahabw’enki baingi batandikire kza SACCO.

“Waaza kwetegyereza omu SACCO zaitu, noreeba abantu baingi nibateera orunyerere barikutamu sente nari barikuziihamu. Eki nikimanyisa ngu SACCO ezi kuri zitariho, abo abantu boona bakaagiire omubanka, kutamu esente,” nikwo Rodgers arikugira.

Allen Ayebare kagambirizi wa Centenary Bank agambeire TV West ngu banka z’eby’obushubuzi zikiri ahamuramwa ahabw’okuba ebibiina bya Biika-Oguze nibibiika nazo.

Kwonka aharubaju orundi, Dokita Bariyo naahiga abarikukurira ebibina bya bika oguze kutaho engyenderwaho ezorekyereire kureetaho obumwe hamwe n’obutegyeki burungi.

“Aga amateeka gashemereire kuzaho, kuhwera SACCO kureebeka ngu zaakora gye obwo nazo zirikuhwerwa kutunga sente kuruga omu gavumenti n’ahandi. Reeru amabanka agatarikwenda kukora gye, agatarikwenda kuhayana n’abandi, garugyeho! nikwo bariyo arikugira.

Ebibina bya bika oguze nibigamwa kuba byatandikireho omumwaka gwa 1913 obwe birikutandikwaho abahingi omuri Mubende abaabaire nibenda kurwanisa abajungu abaabaire nibabaseera obwe barikugura ebihingwa byabo ebyabaire birimu omwani, ebitookye n’ebindi.

LEAVE A REPLY